وجه الشاعر الغنائي أمير طعيمة، رسالة شديدة اللهجة بسبب الحجاب، وذلك عبر حسابه الشخصي على موقع التواصل الاجتماعي «فيسبوك».
وقال أمير طعيمة، في منشور على صفحته الشخصية على موقع التواصل الاجتماعي 'فيسبوك': 'هو موضوع فلانة لبست الحجاب و فلانة خلعته ده شاغل الناس ليه، ايه مشكلة البعض مع الحجاب اساسا.. و بعض الاعلاميين ومن يطلق عليهم العلمانيين بيستقتلوا ليه عشان نفي فرضية الحجاب، يعني لو المحجبة اقتنعت بفتاويك و قلعت الحجاب الكون والكوكب والبلد هيستفيدوا ايه؟ هل احنا مثلا دولة بنفرض لبس الحجاب على المرأة فإنت ضد قهرها؟ لا'.
وأضاف: 'هل احنا بنضيق على غير المحجبة مثلا في الوظائف والحياة العامة فإنت ضد ظلمها؟ لا، بل بالعكس دي غير المحجبة هي اللي فيه تضييق عليها في الفن والإعلام وبعض الوظائف ده حتى فيه أماكن ومطاعم بتمنع دخول المحجبات'.
وتابع: 'يبقى السؤال: الست المحجبة دي مضايقاك في ايه وقارفها في عيشتها بكلامك ليه، وعمال تجيبلي صور قديمة وتقارنها بصور جديدة كما لو كان ده دليل اننا كنا متحضرين وبقينا متخلفين، معلش هو مال التحضر بالحجاب والفستان المفتوح والميكرو جيب مش فاهم، يعني المحجبة لو لبست اللي بيبسطك معدل ذكائها وانتاجيتها هيرتفعوا فالبلد هتروح في حتة تانية؟'.
وأكمل: 'و بعدين تعالى نفترض اننا صحينا من النوم لقينا البلد كلها مفهاش محجبة واحدة زي ما بتتمنوا .. ها ؟ طلعنا القمر كده، ؟ بقينا في مقدمة الدول تعليميا ؟ معدل النمو هيزيد ؟ هنغزو العالم و الجنيه هيبقى بالف دولار؟'.
وواصل: 'و يا عم يا اللي شايف الإلحاد ظاهرة صحية ودعوة للتفكير والشذوذ حرية شخصية، ممكن تتواضع وتعامل المحجبة نفس المعاملة وتعتبرها حرة في اختيار لبسها وتكبر دماغك وتشوف وراك ايه وتعمله، ولا انت اللي معطلك ومخليك خيبان كده ان فيه ستات محجبات حاجبين عنك أحلامك واهدافك العظيمة'.
تابعوا آخر أهل مصر على Google News
