شارك المطرب الشاب محمود المنسي فيديو عبر صفحته الشخصية على ' فيس بوك' يعبر فيه عن أسفه لأكرم حسني بعد أن اتهمه باقتباس لحن أغنية 'للي' التى غناها الكينج ' منير 'من أغنيته ' ولد الهلالية ' وقال في الفيديو :' ازيكم، بالنسبة للجدل اللي أثير الأيام اللي فاتت بخصوص تشابه لحن أغنيه (للي) مع أغنيتي ولد الهلالية ومطالبتي بحقوقي الأدبية، فأنا حابب أوضح أكتر من نقطة، أنا لما نزلت أغنية 'لِلي' وسمعتها، لاحظت على طول إن لحنها يكاد يكون متطابقًا مع لحن أغنيتي، فأنا كفنان غيرت على شغلي وتعبي وعملت فيديو أطالب فيه الناس إن هي تحكم، وعملت خطوات نحفظ فيها حقوقنا وقدمنا شكوى على فيديو الشركة المنتجة واتقفل'.
وتابع: 'من بعدها الشركة المنتجة تواصلوا معنا، وقعدت مع الفنان أكرم حسني، وبصراحة الراجل استقبلني في بيته، وأحسن ضيافتى، وكان في منتهى منتهى الأدب والذوق والاحترام، بس ما وصلناش لحل، وبعدها أخويا وصديقي الفنان أمير محروس، تواصل معايا وحاول يقرب وجهات النظر، وأنا بشكره جدًا من كل قلبي على مجهوده لحد ما رجعت لنفسي، وحطيت النوتين جنب بعض، لقيت فيهم تشابه كبير لكن مش تطابق ، وهنا أدركت أنى أسأت تقديرى للموقف تمام، وزى ما أنا قولت قبل كدا إن الفلكلور ملك للجميع في التصرف فيه، ف أنا استخدمت الفلكلور بتصرف وهو استخدمه بتصرف، والنتاج الأخير إن الأغنيتين مش شبه بعض'.
وأوضح: 'وبالنسبة للاتهامات اللي بتقول إن أنا سارق من الفولكلور فأنا واخد بيت واحد بس من الفولكلور، وبنيت عليه أغنية أربع دقائق من إبداع المؤلف والملحن تقدروا تسمعوهم، وعندنا أمثلة كتير من الموضوع ده، واتعملت في أغاني كتير أنتم بتحبوها زي على حسب وداد لعبد الحليم حافظ، زي أغنيه خطوة يا صاحب الخطوة من ألحان عزيز الشافعي وأغاني تاني كتير جدا'.
وأكد على انزعاجه من عناوين السوشيال ميديا التي قالت إنه يتهم أكرم حسني بالسرقة، قائلا: 'وكمان ضايقني عناوين السوشيال ميديا اللي بتقول إن أنا بتهم أكرم حسني بالسرقة، وده محصلش إطلاقا في أي تصريح مني، ولو الكلام تحور ووصل لك بالشكل ده، فحقك عليا أنت أخ كبير وفنان مبدع، وكلام زي ده ولا يأثر إطلاقا في حد بتقلك، فكان لازم أطلع تاني وأوضح سوء التقدير واعترف بغلطي'.
وتابع: 'أخيرا أنا قفلت الموضوع ده تماما ومش هتكلم فيه تاني، وحابب أبارك لفريق عمل 'لِلى' أبدعتوا بصراحة، ومبروك للكينج وجمهوره، على طول فى حته تانية'.
يذكر أن المنسي سبق وقد ظهر من خلال فيديو قال فيه: 'إن أول أغنية من إنتاجى كانت بعنوان ولد الهلالية.. بصراحة أنا مضايق جدا من بعد ما نزلت أغنية محمد منير (للّى) واتفاجئت إن اللحن بتاعها (كوبى بست) من أغنيتى.. أنا مش طالع أتهم حد بعينه ولا محتاج تبريرات زى توارد الأفكار أو توارد الألحان.. لأن الفنان محمد منير فنان كبير وله تاريخ مشرف وأنا من عشاقه.. وأكرم حسنى فنان مبدع.. لكن بعيدا عن آرائنا الشخصية أنا متمسك بحقى الأدبى جدا'.
تابعوا آخر أهل مصر على Google News
