حلت الفنانة وفاء مكي ضيفة علي برنامج 'كلام الناس' الذي تقدمه الإعلامية ياسمين عز علي قناة MBC مصر، وعبرت عن استيائها مما حدث تجاه الفنان الراحل هشام سليم على مواقع التواصل الاجتماعي في أيامه الأخيرة.
وقالت وفاء مكي: 'عارفه قعدنا نصور الراية البيضا فترة طويلة، سافرنا مع بعض وعشنا مع بعض، ما بين القاهرة والإسكندرية والأردن، وشفت قد إيه أخلاقه جميلة، وبني آدم جميل وكويس، ومن جواه في حاله، ما أذاش حد، كان عنده حاجة حلوة بيعملها، ومعندوش مبيعملهاش'.
وأضافت: 'زعلانة عشان البهدلة اللي في الآخر، حرام ليه كده؟، يعني وصلني تعليق، شوية شوية هينزلوا معاه القبر وهو بيتحاسب، وابنه ومش ابنه، يا جماعة احنا في إيه ولا في إيه؟ وكنت قريبة منه وعارفه قد إيه هو إنسان وجدع، وبيعمل حاجات كتير خير وحلوة قوي، من غير ما حد يشعر بيها، صعبان عليا، ربنا يرحمه يارب'.
واستكملت وفاء حديثها قائلة: 'الرحمة، الرحمة حلوة قوي، وده موت له حرمته وله هيبته، وده بس اللي حازز فيا، وصلت لمرحلة ان السوشيال ميديا مليش علاقة بيها خالص، بحس إنها بتضر أكتر ما بتنقع، بتنتهك حرمات الناس، بتتدخل في أدق التفاصيل ومن غير ما حد يعرف حاجة، كل ده عشان يعملوا نسبة مشاهدة، طب وليه؟، حرام، ربنا هيسألك الفلوس دي، أنت تعرف حاجة عن وفاء؟، عشان تتكلم في خصوصياتهم'.
يذكر أن الفنان هشام سليم رحل عن عالمنا عن عمر يناهز 64 عاما بعد صراع مع مرض سرطان.
تابعوا آخر أهل مصر على Google News
