لأول مرة.. وفاء سالم تكشف تفاصيل معاناتها من مرض نفسي ومحاولة التخلص من حياتها

كشفت الفنانة وفاء سالم عن تعرضها لحالة نفسية سيئة عام 2019، وصلت إلى أنها حاولت الانتحار.

وقالت وفاء سالم، خلال استضافتها في برنامج 'الستات' الذي تقدمه الإعلاميتان مفيدة شيحة وسهير جودة على قناة 'النهار': 'كان عندي حالة اسمها (بوردر لاين)، وهو مرض له أعراض متشابكة، زي البكاء في أي لحظة ولأقل الأسباب، ورفض التعامل مع الناس، ومن الصعب تحديد سببه'.

وأضافت 'سالم': 'لما ابني أدهم قرر يستقل عني يمكن ده سببلي صدمة نفسية، وحسيت إني هكمل حياتي لوحدي لإني مش عايزة أرتبط، وبدأت الحالة تتصاعد'.

وتابعت: 'يوم الوقفة سنة 2019 كنت لوحدي في البيت في آخر دور في الفيلا، ويفصلني عن الدورين السفليين أبواب حديد لإني كنت فاهمة ده أمان، ولقيت الهلاوس عليت في دماغي، وبقيت رافضة كل حاجة بتحصل حواليا، ومش قادرة أتحكم في تصرفاتي، وعندي نوبات هلع، فوصلت لمرحلة يا رب عايزة أموت، وفي اليوم ده حاولت أنتحر'.

وتحدثت وفاء سالم تفاصيل تدخل ابنها لإنقاذها في اللحظة الأخيرة قائلة: 'لقيت صوت من بعيد بيقول يا ماما، وكان أدهم مش قادر يطلعلي وعايز يكلم المطافي، لإن صحابي كلموه بعد ما قفلت موبايلي'.

وواصلت: 'طفيت التليفزيون وقعدت أستغفر وأصلي على النبي، ونزلت بنفسي في حالة غياب عن الوعي، فتحت البوابات ودخلت ابني، وأخذني في حضنه ودخلني العربية وأخذني على المستشفى'.

وأكملت: 'قعدت في العناية المركزة، والدكتورة قالت إني مش لازم أرجع نفس المكان، وفضلت في المستشفى شهرين'.