طارق الدسوقي عن الظهور مع محمد رمضان: مش دا المسلسل اللي أرجع بيه

كشف الفنان طارق الدسوقي أسباب اعتذاره عن المشاركة في مسلسل العمدة، مع الفنان محمد رمضان، والمقرر عرضه في السباق الرمضاني المقبل 2023.

طارق الدسوقي يعتذر عن مسلسل العمدة

وقال طارق الدسوقي في برنامج كلام الناس عبر قناة ام بي سي مصر: 'اعتذرت عن مسلسل محمد رمضان، أولا رمضان ممثل جيد وشاطر ومحمد سامي مؤلف ومخرج شاطر، والكاست كويس جدا، وقعدت مع سامي واتكلمنا قبل البروفة، ولقيت في الحقيقية فيه اختلاف كبير في وجهات النظر، والطرح حسسني أن مش دا الدور أو المسلسل اللي ارجع بيه للناس، ولا الإطار اللي أظهر بيه، اعتذرت ببساطة شديدة'.

وتابع الدسوقي قائلا: 'الجملة الصريحة اللي حسستني مش هينفع أكمل وهي وجهة نظر محمد سامي، ووجهة نظر كثير من المخرجين والفنانين في مصر والعالم وهي لما قالي أحنا بنعمل الفن والدراما عشان نسلي الناسي نضحكهم نبكيهم نرعبهم ونسمرهم قدام الشاشة، وده شيء غلط، لأن مصر بتمر بمرحلة خطيرة ومهمة و معنديش وسيلة إعادة صياغة وجدان الناس والقيم والأخلاق غير الدراما، واي كلام مباشر في برنامج او خطبة في جامع او في كنيسة مش مؤثر زي مسلسل درامي، حدوتة تأثيرها رهيب بيوصل لملايين الناس'.

وأضاف طارق الدسوقي قائلا: 'من وجهة نظري الدراما الحقيقية هي اللي بتغوص في مشاكل الناس، وتحاول تطرح حلول ليها وترسخ الهوية المصري وتذكي روح الانتماء خاصة عند الشباب، وتلقي الضوء على فترات مضيئة في تاريخنا'.

يشار إلى أن الفنان طارق الدسوقي يغيب عن الساحة الفنية منذ نحو 5 أعوام حينما قدم آخر أعماله المسلسل الإذاعي 'الليث بن سعد' عام 2018 .