بعد دوره في الأجهر.. ناقد فني: عمرو سعد بيكرر نفس كل حاجة ومبيدورش على الجديد

وجه الناقد الفني جمال عبد القادر، انتقادا إلى الفنان عمرو سعد، بسبب مسلسله الجديد 'الأجهر'، الذي يعرض في دراما رمضان 2023.

عمرو سعد مسلسل الأجهر

وكتب جمال عبد القادر، عبر حسابه على فيسبوك: 'وانت بتتفرج على عمرو سعد، ومش عارف اسم المسلسل، هتتلخبط هو ده الأجهر، ولا توبة، ولا ملوك الجدعنة، عمرو بعد نجاح ملوك الجدعنة قرر يمسك في الجو الشعبي ويكرره ويحلبه لآخر مشهد، لعب على المضمون، بدل ما يدور على شخصية جديدة وفكرة مختلفة، يروح بيها لمنطقة تانية ويفاجيء الجمهور'.

وأضاف عبد القادر: 'لكن الأسهل له تكرار نفس كل حاجة، واستثمار نجاح عمل سابق له، سمة أساسية في الجيل الحالي التكرار وحلب الشخصيات واللعب على المضمون، وبعد شوية يحصل تشبع للجمهور من الفنان وكل ما يقدمه، ويركن عمرو والعوضي ورمضان جنب هنيدي وسعد ويطلع جيل جديد يكرر نفس الأخطاء والسقوط، وده الفرق بينهم وبين جيل نور الشريف وعادل إمام ومحمود ياسين، الجيل اللي كان عنده وعي بما يقدمه وترمومتر يقيس به رضا أو غضب الجمهور، التنوع اللي قام به الجيل ده هو سبب الاستمرارية والبقاء حتى بعد رحيلهم'.

واختتم جمال عبد القادر: 'وبعيد عن عمرو سعد وعبد الجليل، وتكرار الإفيهات والكلام والسجع وقلع الهدوم، وتكرار كل حاجة، خلينا نقول إن الفنانة درة أفضل من في العمل، مرحلة نضج فني واختيارات محسوبة بدقة، اختلفت عن بدايتها بشكل كبير، درة بتلعب في منطقة لوحدها ومش مشغولة بحد ولا بكلام، ودي أهم ميزة فيها'.