إلهام شاهين: ديما بشجع الشباب وبفرح بيهم جدا (فيديو)

أعربت الفنانة إلهام شاهين عن سعادتها البالغة بالتكريم الذي حصلت عليه من مهرجان تري كور الفرنسي للأفلام القصيرة جدا، والمقام في الجامعة البريطانية في مصر.

تكريم إلهام شاهين

وقالت إلهام شاهين لـ'أهل مصر': 'اتكرمت قبل كده الجامعة البريطانية، الحقيقة بحبهم جدا، دخلت الجامعة البريطانية أول مرة من كذا سنة دخلني لها أستاذي اللي قدمني في أول بطولة في حياتي المخرج سمير سيف الله يرحمه، كان دكتور مدرس هنا في الجامعة ومن أول دفعة خلاني في لجنة التحكيم معاه، وابعت معاه الدفعة لحد ما اتخرجت وللأسف هو اتوفى قبل التخرج بفترة بسيطة وكان يوم التخرج كل الطلبة وأنا مفتقدينه جدا، كنت معاهم وفرحانة أن الدفعة دي بدأت على ايديا'.

وتابعت إلهام شاهين: 'انا ديما بشجع الشباب، بفرح بيهم اوي الحقيقة أن الجامعة مهتمة بالسينما والفنون، وكلية الاعلام عندهم على مستوى عالي، وأنا شفت ده وشفت استيديوهاتهم وبيشتغلوا ازاي، فشيء جميل ورائع أننا بنمي مواهب الشباب بتوعنا، وشفت أفلامهم القصيرة فيها فكر وفن حقيقي جميل، وأفلام على مستوى عالي جدا، ربنا يوفقهم وبفرح بشبابنا وبمهرجان بيشجع الشباب فرنسي في الأساس عمره 25 سنة وفيه 34 دولة بيشاركوا فيه ودي السنة التامنة يقام على أرض مصر وشكرا للجامعة البريطانية على اهتمامهم بالفنون والسينما وشكرا للمهرجان لأنه يقام على أرض مصر'.