أول رد من وفاء مكي على هجوم سيد شعراوي عليها

ردت الفنانة وفاء مكي على هجوم المصور سيد شعراوي عليها بعدما تجاهلته في مؤتمرها الصحفي الأخير، رغم وقوفه بجوارها الفترة الماضية على حد قوله.

وقالت وفاء مكي في تصريح لـ 'أهل مصر'، إنها رغم ما قاله سيد شعراوي عنها إلا أنها تكن كل الاحترام والتقدير له'، لافتة إلى أنها لن تعلق على الموضوع بأكثر من هذه الكلمات.

سيد شعراوي يهاجم وفاء مكي

يشار إلى أن المصور سيد شعراوي، شن هجومًا حادًا على الفنانة وفاء مكي، وذلك لتجاهل الأخيرة له في المؤتمر الذي عقد لها مؤخرًا.

وقال سيد شعراوي من خلال بث مباشر، أجراه بموقع 'أهل مصر'، 'أنا مصدوم من اللي حصل ليه يا وفاء تعملي كده فيا، طول المشوار واقف معاكي وكل اللي كانت بتعوزيه كنت بنفذهولك بدون مقابل ولوجه الله، في الآخر تتجاهليني وملاقيش لنفسي مكان أو كرسي أقعد جمبك في مؤتمرك الأخير، وتقولي فيه ناس عرفوني بالدكتور، أنا بقيت ناس يا وفاء أنا سيد شعراوي اللي بتقولي عني في جميع لقاءاتك لو كان فيه سيد شعراوي من 23 سنة كنت أنا هبقى في حتة تانية'.

سيد شعراوي:"أنا اللي عرفت وفاء مكي بدكتور تكميم المعدة"

وتابع سيد شعراوي:'أنا معرفها بالدكتور محمد اللي عملها عملية تكميم معدة، وأقسم بالله ما خدت ولا مليم وأستاذة مروة بغدادي كلمتني وقالتلي الدكتور محمد عايز يعملها عملية تكميمم، ومروة برضه ستايلست وبتلبس فنانات فعايزة برضه تكون في الصورة، وفوجئت أنها بتيجي في المؤتمر وتقول ناس عرفوني بالدكتور محمد، لما جيت ملقتش مكان قعدت على كتف الكرسي بتاع الدكتور محمد وقلتلها لا أنا اللي عرفتك بالدكتور محمد عن طريق مروة بغدادي.. مش بتدي الناس حقها مش لاقي سبب أو عذر ليها وباصة للمادة في الأول والآخر بس مش بالطريقة دي يا وفاء'.

سيد شعراوي: وفاء مكي هي اللي طلبت مني أن أنا أعمل استغاثة

وواصل: موضوع متورطة أو لا في قضية الاعتداء مش بتاعتي بتاعت القضاء، وهي طلبت مني أن أنا أعمل استغاثة وقالتلي عندي بيت وولد وأمي مريضة وعايزة أصرف عليهم يا سيد عايزة اعمل استغاثة، قولتلها نعمل إستغاثة لرئيس الجمهورية وعملناها، بعدها جالها مسلسلين صيد المغارب اللي اتوقف إنتاجيا ومسلسل الإمام الشافعي ومكملش، وقولتلها حتى لو دور صغير أعمليه الصغير بيجيب الكبير'.

وأكمل سيد شعراوي: أول مدخلنا قضية وفاء مكي قيل عني أني متجوزها، ووفاء أكبر مني في السن، وأنا بحب بيتي ومراتي، ورغم ده مرفضتش أساعدها وكملت وخسرت ناس كتير بسببها منهم المستشار أحمد الشاعر، لأنها قالتلي فيه محامية اسمها أسماء إسماعيل قالتلي عايزة نعمل توكيل ليها قولتلها ما إحنا خلاص عملنا توكيل للمستشار أحمد الشاعر وهيشوف كل القضية، قالتلي ده مش فاضلنا عنده مكتب في دبي وأسماء هتعمل كل اللي عايزينه فعملت توكيل عشان مزعلهاش، ولما علم أحمد الشاعر زعل مني وده صديق عمري'.

سيد شعراوي: فيه فنانين كتير مختلفين مع وفاء بسبب قضيتها

وأضاف: 'فيه فنانين كتير مختلفين مع وفاء بسبب قضيتها وخسرت فنانين كتير بسببها ورغم ذلك كنت ماشي معاكي.. مش مصدق، وفاء مكي ممثلة عبقرية تأخد أوسكار أنا كنت بصدق كل حاجة بتقوليها مع أن فيه حجات في الكواليس كتير فيها وشها بيتغير وانفعلاتها..أنا مش طالع أهاجمها طالع أبرر موقفك على تجاهلك ليا، أنا سيد شعراوي وكله عارفني وليا الفخر أن السيناريست يوسف معاطي كتب في مسلسل العراف شخصية شعراوي يلعبها الممثل حازم فؤاد والبطولة لعادل امام'.

سيد شعراوي: أنا مش ناقص تريند

وواصل:'أنا أسف يا وفاء أنا أفادتك أكتر ما أفدتيني، أنا مش ناقص تريند أنا عامل خبطات صحفية كتير، مكنتش منتظر منها أي حاجة كنت منتظر كلمة معنوية، أنا بحب مراتي وولادي ومتجوز اتنين مش عايز أكتر من كده، أنا مش مزواج ومنفصل عن زوجتي الثانية الفنانة كارين نوالي، ومبسوط على المستوى الأسري ووفاء بالنسبالي أختي الكبيرة واتمنالها كل الخير'.