أشاد الفنان محمد فهيم بفيلم مرعي البريمو للفنان محمد هنيدي، الذي طرح بدور العرض السينمائي، خلال الأيام القليلة الماضية، قائلا: 'حضرت فيلم مرعي البريمو، وكان الشعور حقيقي عامل زي فرحة العيد، عيد الضحك بجد، اكتشفت أن في حياتنا حاجة اسمها نوستالجيا هنيدي، كأنه كان واحشني جدا في السينما وأفلامه اللي بتدخلها وتضحك، وتحس فيها بالبهجة، وخرجت فرحان'.
محمد فهيم يشيد بفيلم مرعي البريمو
وتابع: 'عودة أستاذ سعيد حامد أهم حاجة حصلت في السينما السنة دي، حمدا لله على السلامة، وبنحبك جدا، ومتغيبش تاني، منتخب الضحك في الفيلم دا بقيادة كابتن الفريق البريمو هنيدي، الكل كان بيضحك بشخصيته في الخط بتاعه، وكله مذاكر حلو أوي، وبيضحك حلو أوي، أنا حبيت كل الشخصيات، أستاذة غادة عادل والأستاذ أحمد بدير، والأستاذ محمد محمود، والأستاذ لطفي لبيب، والأستاذ علاء مرسي، وأصحابي مصطفى أبو سريع، ومحسن منصور، وأحمد سلطان، والبنات العسل جدا نانسي صلاح، ونيللي محمود'.
وأضاف فهيم: 'الأستاذ المخرج الكبير سعيد حامد، قدر يخلق فريق عمل متجانس والحب ظاهر على الشاشة، والكل حاضر بكل طاقته، وسايب الكل يقول من منطقته، والبريمو هنيدي مستمتع جدا، وواخد الكل وطاير حقيقي من المكاسب الكبيرة ومنها أن الفيلم إنتاج شركة جديدة، والحقيقة أنا بفرح جدا كل ما ألاقي كيان جديد في السينما، بداية موفقة جدا، وقادر على النجاح، لأنه اشتغل بأصول الشغلانة، وطالما كل فريق العمل بيشتغل بالحب دا ومبسوط يبقى دي شركة ناجحة Target Productions.. مليون مبروك للكل حقيقي، وعندي شعور إن نجاح الفيلم هو نجاح لمعاني حلوة كتير، وانتصار لكي لا يصح إلا الصحيح، شكرا جداً'.
تابعوا آخر أهل مصر على Google News
