أعلنت إدارة مهرجان قرطاج الدولي في دورته الـ 57 عن تكريم الفنان محمد حماقي بعد إحيائه حفل ختام الدورة الـ 57 مساء أمس، 19 أغسطس.
ونشرت الصفحة الرسمية لإدارة مهرجان قرطاج صورًا من تكريم مدير المهرجان كمال الفرجاني، وكتبت التالي: السيد كمال الفرجاني مدير مهرجان قرطاج الدولي يكرم الفنان المصري محمد حماقي إثر حفل اختتام الدورة 57 لمهرجان قرطاج الدولي مساء السبت 19 أوت 2023 على ركح المسرح الأثري بقرطاج.
محمد حماقي
عبر الفنان محمد حماقي عن سعادته بمشاركته في حفل ختام مهرجان قرطاج السينمائي بدورته الـ52، قائلا خلال المؤتمر الصحفي للمهرجان: 'أنا سعيد جدًا بوجودي في مهرجان قرطاج، وشرف وحلم لأي فنان أنه يقدم حفلة على مسرح قرطاج'.
وأضاف حماقي: 'سعيد أني بختم مهرجان كبير وعريق زي مهرجان قرطاج، وحلم لأي فنان أنه يكون على مسرح قرطاج في تونس، لعدة أسباب منها عراقة المهرجان وحلاوة الجمهور التونسي، ومن أول ما ابتديت أغني وأنا بسمع للجمهور التونسي هو جمهور فنان وجمهور راقي وصوته حلو، ومعلومة معروفة عندنا أن الجمهور التونسي هو جمهور مغني'.
وعن تأخير وجوده في مهرجان قرطاج، أوضح حماقي: معرفش ليه اتأخر وجودي في مهرجان قرطاج يمكن مكنش في فرصة أننا نتقابل، وجت الفرصة وأخيرًا اتحققت.
وعن غنائه بلهجات مختلفة، قال حماقي: طول عمري بقول موضوع الغنا بلهجات مختلفة، هو مدارس أنا بنتمي لمدرسة أني أغني بإحساس، ومش بحب أفعل راسي وأنا بغني، أنا بشوف اللي بيغني بلهجة مختلفة هو بيشغل نفسه بلهجة تكون صح ومخارج الحروف فـ ده بياخد جزء من إحساسك، وده السبب اللي يخليني مقدمش أغنية بلهجة تانية، أنا بحب أسمع الغنا التونسي بس من التونسى، والغنا قدام الجمهور التونسي مهمة صعبة مش سهل لازم تكون عامل حسابه ومجهز نفسك.
أغنية ما بلاش لوالد حماقي بعد وفاته
أكد الفنان محمد حماقي أن أغنية ما بلاش وقت طرحها في عام 2016، كانت لـ والده بعد وفاته، وعبر من خلالها عن حزنه الشديد بعد رحيل والده ولم يكشف كواليسها وقت طرحها.
وقال حماقي خلال مؤتمر صحفي، أقيم بالأمس على هامش مشاركته في مهرجان قرطاج الدولي: مكنتش عايز من البداية أستنزف مشاعر الناس ولا إن الناس تتعاطف من قبل ما تسمع عشان تحب الأغنية، دي مش طريقتي، واحتفظت بما في داخلي لنفسي، وقدرت أقوله بعد حوالي 7 سنين بعد ما مبقاش فيه شبه استعطاف للناس.
وأوضح حماقي: أنا محستش بفرحة ولكن حسيت إن الناس طبطبت عليا، عارف لما تضعف جدا وتلاقي حد بيطبطب عليك وحاسس بيك، هو ده اللي أنا حسيت بيه إني لما عبرت عن وجعي بالأغنية ولقيت كل الناس متعاطفة حسيت كأن الناس بتطبطب عليا، استقبال الناس كان مختلف وحسيت إن الناس في ضهري وحاسين بيا.
محمد حماقي: صدق مشاعرك في الغنا أسرع وأسهل طريقة لوصول الأغنية للجمهور
وأردف حماقي: وليا واحد صاحبي مخرج اسمه ميدو شعبان كلمني يوم نزول الألبوم ووقف عند أغنية ما بلاش وسألني قالي هي الأغنية فيها حاجة؟ أنا مش حاسس إنها أغنية حاسس إنها أشبه بترتيلة أو بصلاة فيها حاجة روحانية زيادة عن الأغاني، وقولتله كلامك أثر فيا وحكيتله سبب الأغنية قالي وصلني الإحساس وأنا بسمع الأغنية من غير ما أعرف وأظن إن ده اللي وصل للناس.
وأضاف حماقي: صدق مشاعرك في الغنا أسرع وأسهل طريقة لوصول الأغنية للجمهور، كل ما كنت صادق في اللي بتقوله كان الوصول للناس أسهل، ودي مدرستي في الغنا، مش بغني من دماغي أنا بغني من مشاعري ومن جوا ولازم أبقى مصدق.
تابعوا آخر أهل مصر على Google News
