أشاد الفنان عمرو عبد العزيز بمسلسل ليالي الحلمية، وأجزائه الخمس، لما حققته من نجاح ساحق، مؤكدا أن المسلسل مازال يحظى بإعجاب الجمهور الذي يشاهده بكثافة كلما تكرر عرضه.
وكتب عمرو عبد العزيز عبر حسابه الشخصي على موقعه التواصل الاجتماعي فيسبوك: 'بقالي كام يوم بتفرج على ليالي الحلمية الجزء الأول وكأني بشوفه لأول مرة، من وجهة نظر فنية شوية، وعايز أقولكم على شوية حاجات كدا أولا الكاتب الكبير قوي الأستاذ أسامة أنور عكاشة لازم كل الكتاب الشباب اللي بيكتبوا قصص وسيناريوهات يتعلموا منه كتير قوي، لأنه بجد عبقري بمعنى الكلمة'.
وتابع: 'ثانيا إزاي قدر يعمل التوليفة الدرامية الصعبة دي، بين الطبقة الارستقراطية والفلاحين والعمال والعوالم وأهل الحارة، في ضفيرة مقنعة جدا وكل شخصية مكتوبة بشكل غير طبيعي، وليها لغة حوار خاصة بيها لوحدها، بتميزها عن بقية الشخصيات، ثالثا اختياره لأسماء الشخصيات اللي يخليك تحفظها كلها، سليم البدري ـ نازج السلحدار ـ سليمان غانم ـ وصيفة المرزوقي ـ بسّة ـ الخُمس ـ سماسم العالمة ـ حمدية ـ أنيسة ـ توفيق البدري ـ كمال خِلّة ـ زينهم السماحي ـ زكريا عامل المصنع ـ عاصم السلحدار.
عمرو عبد العزيز: إسماعيل عبد الحافظ أخرج عملا صعبا
وأضاف عمرو عبد العزيز: 'رابعا، المخرج الأستاذ إسماعيل عبد الحافظ اللي قدر يخرج هذا العمل الصعب جدا، بتفاصيله الكتير من ديكورات القصور، و البيوت القديمة والحواري، ويطلع كل التفاصيل دي اللي كتبها المؤلف، لأنهم كانوا بيقعدوا مع بعض يوميا بالشهور والسنين علشان العمل يطلع بالشكل ده'.
واختتم: 'رحمة الله عليهم جميعا، بجد أنا في قمة سعادتي لأنى اشتغلت آخر عمل مسرحي كتبه العبقري أسامة أنور عكاشة، وهي مسرحية ولاد الذين، في 2007، وبعد عرض المسرحية في التليفزيون جاتلى مكالمة من الأستاذ أسامة كنت في غاية السعادة لما قالي باللفظ، واد يا عمرو انت ممثل هايل، وبجد انت طاقة ع المسرح، أنا ماشوفتش زيها من سنين'.
تابعوا آخر أهل مصر على Google News
