ناقد فني يروي مخطط عصابة الفنانات الاستعراضيات

روى الناقد الفني إلهامي سمير، حكاية واقعة قديمة تسببت في خوف شديد للفنانة نجوى فؤاد، وذلك عبر حسابه الشخصي بموقع فيسبوك.

وكتب إلهامى سمير عبر حسابه بفيس بوك: 'في يوم من الأيام رن الجرس فى شقة الفنانة الإستعراضية شوشو عز الدين، ولما فتحت لقت 3 شباب صغيرين قدامها بيقولوا لها أنهم من مكتب الأستاذ عرابي وكيل الفنانين، وجايين يتفقوا على فرح فى طنطا فالست قالت لهم اتفضلوا ادخلوا واول ما دخلوا واحد منهم طبق فى زمارة رقبتها والتانى مسكها من ايديها والتالى حط ايده على بقها عشان ما تصرخش'.

الصرخة رجت العمارة

وتابع: 'لكن الست شوشو لحقت تصرخ والصرخة رجت العمارة .. وخرج مصطفى كمال سكرتير رشدي اباظة يجرى وراهم وينادى على الناس علشان تمسكهم .. وفى النهاية تم القبض على التلاتة .. واتحولوا للتحقيق'.وأضاف إلهامي سمير: 'في التحقيق اعترف التلاتة وكان عمرهم 17 سنة بأنهم كونوا عصابة مع 6 تانين بيرأسها واحد اسمه محمد عبدالعزيز عطية، وانهم اتفقوا أنهم يقوموا بعمليات سرقة علشان يلاقوا فلوس يصرفوا بيها على نفسهم، وحطوا قايمة باسماء فنانات علشان يسرقوهم ويقتلوهم، وكان اول 3 أسماء فى القائمة شوشو عز الدين تليها نجوي فؤاد تليها برلنتي عبدالحميد'.

وأختتم: 'طبعا نجوى فؤاد أول ما عرفت بالخبر حمدت ربنا أنهم لحقوا يقبضوا على العصابة قبل ما توصل لها، ويومها خدت مجموعة من القرارات .. اولها انها طلبت من البواب ان مفيش اى حد يطلع لها الا اصحابها القدام.. ده بخلاف انها ركبت (عين سحرية) علشان تشوف الأول مين على الباب قبل ما تفتح .. اما تانى قرار فإنها تفتح مكتب تقابل فيه اي حد جاي يتعاقد معاها على شغل جديد واتفقت مع 4 جاردات علشان يبقوا موجودين فى المكتب ليل نهار لحمايتها'.