‎بعد انتقاد طارق الشناوي لـأولاد حريم كريم.. بشرى: «من أمتى بيمدح حاجة»

علقت الفنانة بشرى على انتقاد الناقد الفني طارق الشناوي، وهجومه على فيلم 'أولاد حريم كريم'، والذي قامت بإنتاجه مؤخرًا ومن بطولة الفنان مصطفى قمر.

وقالت بشرى خلال مداخلة هاتفية لبرنامج 'قعدة ستات'، الذي تقدمه الإعلامية مروة صبري على شاشة 'القاهرة اليوم'، الفيلم يجمع بين النوستالجيا والجيل الجديد، والكواليس مع المخرج علي إدريس كانت جميلة، واسألوا الشباب الجديد اللي اشتغل مع فنانين عندهم خبرة حسوا بألفة ولا، الناس مستغربة حالة الحب اللي موجودة في العمل، وده قليل لما بيحصل في الوسط بتاعنا.

بشرى: بعض النقاد أرائهم انطباعية مش تحليلة بشكل علمي

واستكملت بشرى حديثها عن انتقاد طارق الشناوي للفيلم: في بعض النقاد أرائهم انطباعية مش تحليلة بشكل علمي بتحسس الناس أنهم مشافوش الفيلم أصلا ومسكوا في شخص واحد اتكلموا عليه، والحمدلله ردود الفعل عند الجمهور حلوة جدا، أصل ده فيلم مهرجانات ولا صوت يعلو فوق الجمهور هو اللي بيحدد، الفيلم جماهيري مش بتاع مهرجانات سينمائية عشان يكون نقدي بالشكل ده، أهم حاجة الناقد يحلل الفيلم وميقتصرش مجهود الفيلم في شخص واحد، عيب في ناس ورا الكاميرا اشتغلت وعمُال كمان.

بشرى عن طارق الشناوي: مفكرتش أكلمه ولا ألومه

وقالت بشرى: مفكرتش أكلمه ولا ألومه ومن أمتى وهو بيمدح أساسا، أنا عندي مبدأ في الحياة اسمه سيري يا نورماندي، مهما حصل مبقفش لكن هو زميل ومعايا في كذا لجنة تحكيم، ولكن مبنتظرش منه مدح يعني.

بشرى ومهرجان الجونة

وتطرق حديث بشرى إلى مهرجان الجونة التي كانت ترأسه لسنوات: الناس كانت بتقول بشرى مبتعزمناش ليه، قال يعني مهرجان الجونة بيت أبويا مش بشتغل فيه، لا طارق الشناوي عمره ما انتقدني وأنا رئيس، وأنا بتوقع من أي حد أي حاجة طول الوقت.

برنامج 'قعدة ستات' تقدمه الإعلامية مروة صبري على شاشة 'القاهرة اليوم' يوم السبت من كل أسبوع، وتستضيف من خلاله عددًا من الفنانات وتناقش قضايا مختلفة.