أول ظهور بعد أزمة ابنته أسما.. شريف منير يعتذر لصحفية: أنا آسف كنت قليل الذوق

اعتذر الفنان شريف منير لصحفية تسبب لها في إهانة أثناء عزاء والدة الفنانة دينا الشربيني أمس بمسجد المشير طنطاوي.

ونشر شريف منير فيديو عبر انستقرام وقال فيه: 'امبارح كنت في عزاء والدة دينا الشربيني في مسجد المشير، وبعدين وأنا خارج قابلت مجموعة من الشباب الصحفيين، وأنا متجه لعربيتي كانوا بيصوروني بالموبيلات، فقولت كلمة، وأنا بقولها في أخت صحفية قالت حاجة فجأة كدا يا إما تعليق يا إما سؤال بس كان مفاجئ، فكان رد فعلي سريع جدا قلتلها هششش.. فلاقيت أن أه عيب أوي فاتلبخت فقولت ألم الموضوع فقولتلها إنتي فاكرة نفسك صحفية ولا إيه، لاقيت نفسي بغلط أكتر'.

A post shared by Sherif Moneer (@sherifmoneerofficial)

وتابع: 'أنا متضايق من اللي حصل دا، وحصل إن الفيديو نزل على اليوتيوب، يمكن مفيش ناس كتير شافته، بس أنا لما شوفته اتضايقت من نفسي، وناس علقت إني قليل الذوق، وإني مكنش ينفع أعمل كدا، وإيه الغرور دا، فعلا أنا استاهل كل التعليقات الوحشة دي، هي مش وحشة هي صح، لأني غلطت، وكان لازم آخد جزائي'.

وأضاف شريف منير: 'أنا باعتذر عن الطريقة اللي أنا اتكلمت بيها، ورد الفعل اللي اتكلمت بيه للآنسة الصحفية وللشباب الصحفيين، اللي كانوا موجودين، وأعتذر لجمهوري اللي كان على يويتوب، وعلق وهو زعلان مني، أرجوكم متزلعوش وحقكم عليا، أنا فعلا كنت غلطان، وفعلا كنت قليل الذوق واستاهل النقد اللاذع دا، وأنا أبويا علمني إني لما أغلط أقول أنا آسف، أنا آسف وأرجو قبول اعتذاري'.