تامر حسني «يجبر خاطر» فنان مظلوم: «أتمنى نفتح باب شغل مع بعض»

وجه الفنان تامر حسني رسالة مؤثر للفنان رامي نادر، بعدما تعرض للاحباط من البعض، وذلك عبر حسابه الشخصي على موقع التواصل اكس، تويتر سابقا.

وكتب تامر حسني: «لفت نظري البوست ده، أستاذ رامي أنت فنان محترم و ردك حقيقي راقي رغم تعرضك لكلام محبط انت مردتش الإساءة بالإساءة و ده ليه اعتبار كبير أوي فوق ما تتصور عند ربنا قبل البشر و ممكن تكون جواك زعلت بس أكيد التعليق اللي زعلك ده ممكن يكون سبب في حاجة تفرحك قريب و هتشوف كلامي».

تمثيل

وتابع تامر: «أنا شخصياً مكنتش عارف أنك بتمرن تمثيل وعرفت من البوست ده و هبعتلك شباب يتمرنوا عندك و أتمنى اقابلك وأتعرف عليك و نفتح باب شغل مع بعض، و أتمنى من الشاب اللي كتبلك كده أنه يراجع نفسه و ميحاولش يحبط حد تاني لأن الكلمة المحبطة فعلاً ممكن تموّت بجد و يكون تأثيرها أكبر من السلاح، التعليق السلبي اللي اي حد بيكتبه بمنتهى البساطة و هو في بيته بيضحك !!!! ممكن يكون سبب في قتل حد نفسياً او يكون سبب في تدمير أسرة أو سبب في جرح روح كانت فرحانة و متفائلة و بسببك كل ده اتهد، ربنا يوفقك يا فنان يا محترم».

واختتم تامر حسني: «يا شباب خلونا رحيمين على بعض عشان ربنا يرحمنا، عشان كل ما بقيت رحيم في كلامك هتلاقي ربنا بيسخرلك في عز زعلك و احباطك ناس تفرح قلبك بالكلام الرحيم اللي يقويك على الدنيا».