أيمن سليم عن المغني الملثم توليت: صوته شبه أصواتنا وإحنا بنغني في الحمام

علق المؤلف أيمن سليم على ظهور مطرب ملثم يطلق على نفسه اسم توليت ويحقق نجاحا كبيرا مؤخرا بألبومه الذي طرح منذ عدة أيام.

وكتب أيمن سليم عبر حسابه بموقع فيسبوك:'المطرب مسلم هو صاحب فكرة إن مغني يلبس قناع و الجمهور مايعرفش شكله لكن بما إننا شعب غلبان من اللي بيتعمل فيه نفس المقلب كذا مرة بنفس الطريقة و يضحك عادي ف تجربة المطرب ( توليت ) نجحت هي كمان و الحقيقة أغانيه لذيذة و مختلفة مود تسعيناتي مع مزيكا جديدة لكن شكل حوار القناع ده مش مجرد حركة و هيستمر كتير لحد ما يبوخ '.

وتابع:'مالك يا أستاذ تواليت ؟ ما تشوفلنا إسم عدل نناديك بيه ، و طالما خرجت من إطار السوشيال ميديا و بدأت تعمل حفلات يبقى خلاص فكرة قناع مسلم اللي انتوا الاتنين سارقينها من مطرب أجنبي دي المفروض تخلص بقى ، ليه أنا كجمهور أحضر حفلة لواحد ملثم ؟ أنا رايح حفلة لحرامي ؟ و ليه يتعمل بانرات في الشوارع لحد مانعرفش شكله ! هي فلوس على الأرض؟'

واضاف أيمن سليم:'و رغم إن عجبني كذا أغنية لكن الحقيقة إن أستاذ تواليت صوته شبه أصواتنا و إحنا بنغني في الحمام بس الاوتتيون ظابطله الدنيا أكترشوية و المود العام للمزيكا مع الكلام البسيط و ستايلات حميد الشاعري همَ اللي ساهموا في نجاح الحالة كلها .. تفتكروا توليت هيلحق نفسه و لا تووليت ؟'.