رد الفنان تامر حسني على الإشادة التي تلقاها من الفنان رامي صبري بعد تعاونهما مؤخرا في أغنية تحمل اسم 'فعلا مبيتنسيش'.
وكتب تامر حسني عبر حسابه الرسمي بموقع فيس بوك:'حبيبي يا رامي إنت قبل ما تكون نجم كبير و مُهم إنت صاحبي من أيام الطفولة و دي حاجات الناس متعرفهاش و يمكن مكنش في فُرصه نحكي ده قبل كده، إنت يا رامي صاحب عُمر و مشوار مشيناه من الطفولة و أنا في الصورة ماسك المايك لأخويا و لصوت مصري عظيم يستحق'.
وتابع تامر حسني:'شُكراً يا حبيبي على كلامك الغالي اللي من القلب أنا فعلاً إشتغلت معاك من كل قلبي و بكُل حرص علينا إحنا الاتنين بكُل التفاصيل بدافع الحُب والصداقة و إن ربنا يكرمنا مع بعض، أعتقد إن التعاون ده هيحمس كُل جيلنا إنه يعمل أفكار مشاركة كده وأنا بنادي بيها من زمان من أيام تامر و شيرين و بعدها تامر وبهاء في أغنية قوم اقف وأنا وإنت بعدها إتكلمنا من سنين عشان نجمع البعض من جيلنا و عملنا المستحيل و للأسف معرفناش فقولنا نبدأ بنفسنا عشان نحمس الكُل'.
وأضاف تامر:'حقيقي جمهورنا يستاهل مننا كُل الجديد و كل المُفاجآت اللي تفرحه و المطربين اللي هييجوا بعدنا يستحقوا إنهم يتعلموا ده مننا عشان يكملوه للي بعدهم إنتظروا كليب فعلاً مبيتنسيش بيني و بين أخويا النجم الكبير رامي صبري باشا'.
وكان الفنان رامي صبري نشر اليوم صورة تجمعه مع الفنان تامر حسني ووجه رسالة له بعد تعاونهما مؤخرا في أغنية جديدة تحمل اسم 'فعلا مبيتنسيش'، وذلك عبر حسابه الرسمي على موقع التواصل الاجتماعي فيس بوك.
وكتب رامي صبري:'أنا بشوف الصورة دي بشكل تاني خالص أولاً تامر فنان أخ وغالي ومحترم ( وواثق في نفسه ) ودي للأسف مش موجودة كتير في مغنيين كتير ناجحين ولكن عندهم مشاكل كبيرة ومايعرفوش يبقوا زي الراجل المحترم اللي ماسك المايك ده..تامر حسني فنان كبير جدا جدا ولما اشتغلت أنا وهو في الديو اللي هاينزل الفترة اللي جاية فهمت هو ليه محبوب جدا'.
وتابع:'أولا علشان عنده صفاء نفسي مش موجود عندي أنا شخصياً اه والله أنا دايماً ليا رد فعلا إنما هو بيسيب الحاجات زي ماهي وما بيحبش يرد ودي حاجة صعبة جدا جدا..عاوز أقول مش كل فنان أو نجم يستحق .. لان دايما الأخلاق واحترام زمايلك هو الموضوع مش بس الفن'.
وأضاف:'شكراً تامر حسني على ذوقك واحترامك ليا دايما في التصوير ودايما كنت تقولي أنت مبسوط ايه رايك محتاج حاجة ؟ كل ده ماينفعش يطلع غير من فنان حقيقي عنده أحساس بالناس والأهم واثق من نفسه قريبا جدا هتشوفو وهاتسمعوا أغنية ( فعلا مبيتنسيش) على جميع منصات الموسيقى في العالم'.
تابعوا آخر أهل مصر على Google News
