سيد رجب من احتفالية القبائل المصرية: "العائلة هي الوطن"

قال الفنان سيد رجب، في كلمته باحتفالية "مصرنا" التى ينظمها مجلس القبائل والعائلات المصرية، فى استاد القاهرة، إن العائلة الكبيرة هي الوطن وهي مصر، لافتا إلى أن كل عائلة يوجد بها الكبير، بحبه وعطفه وحكمته وخبرته لذا يجب أن نحترمه ونجله ونسمعه ونتعلم منه، وفي مصر هناك امثلة كثيرة لذلك، فكل عائلة ونجع وقرية ومدينة يوجد بها ناس كبار لابد ان يضعوا على الراس من فوق.

وتابع الفنان سيد رجب حديثه قائلا: "كنت بفكر يعنى إيه بلدى يعنى ايه وطن مصر يعنى ايه، هل هى الحدود الجغرافية اللى كلنا عارفينها هل هي نيلنا العظيم والمدن والمحافظات هل هى الأهرام وتاريخنا العريق؟.. صحيح مصر كل ده، بس أنا لما بسافر برة مصر، بشتاق لمصر، بشتاق لمين؟ لولادى؟ لمراتى واخواتى؟ لأصحابى وجيرانى؟ لعم سعيد صاحب الكشك؟ لزمايلى فى المسرح؟ لزمايلى وأنا بعمل أخر مسلسل عن الأسرة والعيلة؟ صح أنا بشتاق للعيلة بشتاق ليكم كلكم أهلى وناسى وسندى لما بكون محتاج للسند أكيد منكم اللى سافر برة مصر عاش التجربة دى لما شاف واحد مصرى زيه فى الغربة وحس إنه شاف مصر كلها".

وواصل "رجب" كلامه قائلا: "يمكن الأجيال الجديدة لسه متعرفش يعنى ايه عيلة بس لما يكبروا هيعرفوا يعنى العيلة هى الوطن وهى مصر وكل عيلة فيها كبير، كبير بحبه وعطفه وحكمته وخبرته وعلشان كده لازم نحترمه ونجله ونسمعه ونتعلم منه، وعندنا فى مصر بقى كتير، كل عيلة وكل نجع وقرية ومدينة فيها ناس كبار لازم يتحطوا على الراس من فوق".