كشفت الفنانة عايدة رياض عن تفاصيل إصابتها بمرض السرطان والأيام الصعبة التي عاشتها طيلة فترة مرضها، وذلك خلال لقائها ببرنامج 'تحيا الستات' المذاع عبر قناة 'النهار'، وتقدمه الإعلامية راغدة شلهوب.
وقالت عايدة رياض: 'كان شعري بينزل وانا باخد دش.. اتخضيت وانا بلاقي شعري نازل، وعلشان مكنش فيه حد في حياتي ومش مرتبطة مكنش شاغلني كل اللي كان شاغلني المرض نفسه.. لكن لو حد مرتبط المفترض جوزها يراعي الحكاية دي لان النفسية بتلعب دور مهم'.
وتابعت قائلة: 'المرأة مظلومة في مجتمعنا والراجل هو كمان مظلوم.. هو برضه كرجل حاجة تعبانة قدامه وشكلها بيتغير عشرة عمره ومراته.. وهو كمان عليه دور كبير الراجل بيبان بجد في الحتة دي ولازم يكون حساس اكتر من اللازم .. انا عن نفسي اخواتي كانوا بيتاثروا من ورايا لكن قدامي مكنتش باخد بالي من تأثرهم.. كنت لابسة على طول في شعري بونيه'.
وواصلت قائلة: 'خفت من الموت.. بس مش خوفت منه قلت الواحد يستريح احسن من المرض.. المرض وحش ليكي وللي حواليكي بتحسي ان اللي حواليكي تعبان بيكي حاجة صعبة.. لكن الموت في حد ذاته متخافيش منه'.
واردفت قائلة: 'اتعلمت من المرض الصبر والتقرب لربنا اكتر.. الواحد قلبه نضيف طول عمره ومبيعملش حاجة تغضب ربنا وبزكي واصلي انا طيبة جدا فعلا .. بس اتقربت لربنا جدا بالتزام اكتر وربنا شفانى.. بظروف جامدة وبشكر ربنا دايما موجود'.
وكانت الفنانة عايدة رياض أعلنت إنها أصيبت بسرطان المثانة عام 2015، عندما كانت تصور مسلسل 'دهشة' مع الفنان يحيى الفخراني، لافتة أنها شعرت وقتها بالتعب، لكنها انتظرت حتى انتهاء التصوير، وتوجهت لأحد الأطباء، وأخبرها أن الأمر مجرد ميكروب في البول.
تابعوا آخر أهل مصر على Google News
