أصدر فريق المدفعجية من أشهر مطربي المهرجانات في مصر، بيانا عبر صفحتهم على مواقع التواصل الاجتماعي "فيس بوك" عبّروا فيه عن رفضهم لقرار نقيب الموسيقيين هاني شاكر ، مشيرًين إلى أنهم سيكملون الغناء من أجل الجمهور وأن أغاني المهرجان لن تموت.
وجاء نص البيان: ”إحنا المدفعجية من ساعة ما بدأنا واحنا بنطور في المزيكا لفينا مصر ولفينا العالم بيها وفرحنا الناس في أفراحهم وحفلاتهم حتى اللي بيسمعنا في العربية.. احنا وغيرنا بيفرحوا ويتبسطوا عمرنا ما زعلنا حد وهنكمل بيكو وليكو ولسه عندنا كتير ناس كتير طلعت اتكلمت وهاجمت.. وقالوا علينا اللي مش فينا وشتموا فينا احنا كلنا متعلمين وجامعيين.. وأهلينا ربونا على الاحترام والتقدير والأصول".
وأضافوا: محمد صابر “ديزل”، إسلام شوقي “كنكا”، سعيد سامي “دولسيكا”، إسلام محمد: "إحنا ضد أي حد يقول كلمة غلط في المهرجان، مش بنأيد الغلط بس المفروض اللي يغلط يتحاسب لكن التعميم غلط في حد ذاته، مثلا لو حد قتل أحبسه هو وعيلته وصحابه؟.. التعميم غلط مش صح، واحنا كمدفعجية مكملين ومش هنوقف غنا احنا ورانا شعب مش جمهور وهنكمل بيكم وعشانكم وكل حد فرحناه عارف الكلام ده كويس.. المهرجان أكبر قاعدة جماهيرية في مصر وعمره ما هيموت.. شكرا لجمهورنا اللي بيساندنا ودايما في ضهرنا وشكرا ليكم إنكم دايما في ضهرنا وانتو السبب في شهرتنا ووجودنا بيكو".
من ناحية أخرى، قال المطرب عمر كمال، إن قرار وقف مطربي المهرجانات الشعبية عن الغناء الصادر من نقابة الموسيقيين، جاء بعد الجدل الذي أثير على خلفية حفل عيد الحب في استاد القاهرة.
وأوضح عمر كمال في تصريح لـ "أهل مصر"، أن أغاني المهرجانات منذ ظهورها تحتوي على كلمات مثيرة للجدل، ورغم ذلك لم يصدر قرارا بالايقاف، لكن القرار جاء في هذا التوقيت بسبب غناء "بنت الجيران" في الاستاد وتضمنها كلمتين كان عليهما اعتراض، أمام عدد كبير من الجمهور ملايين الناس في البيوت.
وأضاف عمر كمال أن الفنان هاني شاكر نقيب الفنانين طلب تغيير كلمتين في أغنية "بنت الجيران"، وبالفعل حدث ذلك، مشيرا إلى أن هناك خطأ حدث في استاد القاهرة وهو أن "الفلاشة" اشتغلت عليها الأغنية القديمة، وظن هاني شاكر أنهم بذلك يتحدوه ويعاندوه.
وتابع كمال قائلا: "الحمد لله الجمهور واقف معانا لاننا بنعمل حاجة حلوة للشارع ومنستهلش ده كله والموضوع كبير في حقنا، هحاول أكلم أعضاء النقابة وأقولهم أنا مستهلش ده أنا راجل عضو نقابة من 4 سنين وكويس جدا ومش معني إني اشتغلت في مهرجان أو اتنين يبقى أنا مشترك فده".
وواصل حديثه قائلا: "أنا هاخد أغاني المهرجانات لحتة تانية ومش هبطل مهرجانات وهطور منها وأخليها حلوة، وامبارح نزلت أغنية في لوني وبرضي جميع الاذواق".
تابعوا آخر أهل مصر على Google News
