شن الشاعر تامر حسين، هجوما على الفنان زكي فطين عبد الوهاب، عبر حسابه الرسمي بموقع التواصل الاجتماعي فيسبوك، الفنان، بعد انتقاد الأخير للفنان عمرو دياب، ودفاعه عن اغاني المهرجانات.
وكتب تامر حسين عبر فيس بوك: 'أحياناً يبقى عندك واحد صاحبك مُهندس يجيلك دور برد يكتبلك روشتة علاج وخُد ده وهات ده، وده هيخليك زي الفُل بكرة من غير ما يفهم إن كل دوا م اللى بيقترحوا له آثار جانبية وتركيبات كيميائية، وإنه أساسا مش دكتور ولا خريج طب، الأستاذ خريج هندسة'.
وأضاف قائلا: 'كل شُغله رسومات ومباني ولا دخل مستشفى ولا عنده خبرة إنه أساساً يدي حُقنة، بس إزاي مايقولش رأيه، أهو ده بالظبط الظاهرة المنُتشرة في مجالنا الفني وتحديداً مجال (الغناء) من غير المتخصصين في الصناعة والاستهتار والاستهانة بصناعة عناصرها شاعر وملحن وموزع ومُهندس صوت وناس خريجين معهد موسيقى وتربية موسيقية وغيرهم من التخصُصات ومطرب ورؤية فنية ومراعاة ذوق عام للجمهور ومعادلة وحسبة مُعقدة'.
تدوينة تامر حسين
وتابع: 'نيجى بقى لبوست الأستاذ، قالك إفلاس آخر ٢٠ سنة، يعني حضرتك ابتداءً من تملي معاك مثلاً اللي غير شكل الأغنية وقربنا للعالمية، ولا حضرتك قصدك مثلاً أكتر واحد بيحبك اللي خد أورد، ولا أنا عايش الأشهر والأجرأ موسيقياً في مسيرة الفنان عمرو دياب ولا ليلي نهاري اللي اترجم معظم أغانيه للُغات العالم'.
وواصل قائلا: 'طب ممكن يكون قصدك وياه اللي كان في وياه أفضل أغنية في أفريقيا (اللي هي قارة) مش بكلمك ع المهندسين فقط، طب سيبك من ألبومات تانية ولا الليلة اللي خد ٤ جوايز أورد، والراجل رفض يروح يستلمها واكتفى ب فيديو وهو فى بلده، ولا إيه ولا إيه'.
وأكمل تامر حسين قائلا: 'طب حضرتك ماشفتش نجاح يتعلموا فقط بما إني واحد من الصُناع فأدافع من عن نفسي مش هقولك ألبومات آخر ٢٠ سنة، طب ماحدش قالك إن آخر ألبوم الراجل مغير ومواكب كل الأذواق والأجيال ومغير قاموس الكلمة يوم تلات، قدام مرايتها، عم الطبيب، مهرجان، وغيرها'.
واختتم حديثه قائلا: 'الحقيقة أنا عندي استياء من مُجادلة (وجهل من لا يفقه) والاستخفاف والاستهتار بصناعة كاملة بشعراء وملحنين وموزعين ومهندسين صوت بمطرب ناجح بقاله 35 سنة، ارحمونا إنت بتنصر المهرجانات من حيث الشكل الموسيقى والتنوع مثلاً اللى هو فين، إحنا عندنا أكتر من نوع موسيقي نقدمه هاوس لاتين، مقسوم، وغيره ده لو ع المزيكا أما لو بتنصر نوع الكلام و خمور وحشيش ومطوتي وغيرهم من الألفاظ والمصطلحات اللي أخجل أكتبها، دي حاجة تانيه بقى'.
وكان الفنان زكي فطين عبدالوهاب، شن هجوما على عمرو دياب من خلال حسابه على موقع التواصل الاجتماعي قائلا: 'أنا عارف إن فيه ناس هتزعل من الكلام اللي هقوله، لكن بعد الهجوم الشرس على أغاني وموسيقى المهرجانات، نفسي أفهم عمرو دياب الملقب بالهضبة، بمناسبة إيه، أغانيه وألحانه وكلمات أغانيه هي هي من ٢٠ سنة، ده إفلاس فني ما بعده إفلاس، أغاني المهرجانات فيها تجديد وابتكار وتنوع أكتر بكتير غصب عن الملحن الفذ حلمي بكر'.
تابعوا آخر أهل مصر على Google News
