إيناس عز الدين توجه رسالة قاسية بعد إصابتها بـ كورونا: "كفاية نشر فزع ورعب"

وجهت المطربة إيناس عز الدين، رسالة قاسية بعد بإصابتها بفيروس كورونا المستجد كوفيد 19، واحتجازها في مستشفى حميات إمبابة، مؤكدة أن حالة الذعر والقلق التي تصل للأشخاص، تجعلهم يخافون من الإعلان عن إصابتهم بفيروس كورونا أو البدء في العلاج خوفاً من منهم.

إيناس عز الدين

وكتبت إيناس عز الدين: 'معلش بما أني فاضية تقبلوا مني كلمتين قاسيين عليكم من واقع انا عايشاه دلوقتي، حالة الهلع والذُعر اللي الناس فيها فيها احياناً بتخرج منهم تصرفات ممكن توصل مريض كورونا او مشتبه فيه انه يخاف يروح يتعالج او يخاف يبلغ او يخاف يعلن عن مرضه و يفضل انه ييجي على نفسه ويتحمل التعب ويقول ربنا يشفيني و يفضل يختلط بالناس وهو مصاب ولا ان يتقال عنه مريض كورونا ويمشي موصوم بالعار كما لو انه مريض ايدز'.

وتابعت: 'هو معذور عارفين ليه لانكم بتتعاملوا مع مريض الفايرس على انه وباء متحرك مش انسان مريض و عادي و ممكن تاخدوا احتياطاتكم في التعامل معاه وانه ممكن يخف و يرجع لحياته الطبيعية تاني و لازم صوره تنتشر شمال ويمين وصور اهله و اسرته وعياله وساكن فين ومراته بتشتغل فين و عياله في مدارس ايه وتبدأ مرحلة انكم تحسسوهم انهم جرثومة ماشية على الارض وانا مش بتكلم عن نفسي ابداااااً لان انا اللي طرحت وضعي علشان احاول اطمن الناس لكن انا بتكلم عن ناس تانية عاديين عاشوا المعاناة دي زي الحقوا عربية اسعاف اهيه في الشارع كده المنطقة بقت موبوءة'.

وأضافت إيناس عز الدين: 'هتكلم من واقع تجربتي لقيت ناس كتير بتفتي و بتهول و بينشروا الذعر بين الناس بالتهويل المبالغ فيه و يحكوا حكايات ما حصلتش ويألفوا قصص كتير ويحلفوا انهم شافوها بعينهم ويخلوا الناس تعيش حالة من الذعر والرعب و المناطق اللي فيها المصابين يعملوا عليهم حفلة جماعية و دي تقول لازم يعزلوا من المنطقة احسن ينشروا الوباء و ناس تقول واحنا هنعيش ازاي بعد كده مع حد اتصاب في شارع ولا عمارة واحدة وكلام كتيرررررر ابسطه معايا لقيت قصص كتير انتشرت عني انا مش عارفة جابوها منين في بعض جروبات و صفحات المنطقة اللي ساكنة فيها وكل واحدة تحلف وتقسم انها شافت'.

واختتمت رسالتها: 'فالحقيقة تعاملكم الخاطيء مع مريض الفايرس يخلي المريض يخلف يعلن مرضه ويتعالج، احنا عندنا مشكلة في الوعي كبيرة جداً لمستها لما اتعرضت للموقف ده طبيعي جداً ولازم نتخذ الحذر الكافي وناخد احتياطاتنا علشان نأمن نفسنا و أسرنا لكن اللي مش طبيعي هو حالة التهويل اللي حاصلة بشكل مبالغ فيع، زي لما حد يقولك فلان قال مساء الخير فانت تروح تبلغ حد تاني تقوله ده فلان قال مساء الخير و ازيك عامل ايه ويارب تكون في احسن حال و قصة كبيرة، ده اللي احنا بنعمله، فأرجوكم حرصوا واحذروا وخدوا احتياطاتكم بس كفاية نشر فزع و رعب وخوف بين الناس للدرجة اللي توصلهم انهم لو تعبوا يستخبوا ويخافوا يتعالجوا احسن بدل ما يموتوا من الفايرس يموتوا من تصرفاتكم و كلامكم و نظراتكم'.

يذكر أن الفنانة إيناس عز الدين أعلنت إصابتها بفيروس كورونا، وتم نقلها إلى مستشفى حميات إمبابة بعد ارتفاع درجة حرارتها، وتزايد ضربات قلبها السريعة وضيق في التنفس.