كشف حساب على إنستجرام باسم 'ملك ميرغني'، عن تفاصيل الحادث البشع، الذي وقع في التجمع الثالث بالقاهرة، وأدى إلى تشويه جسم طفلة في السادسة عشر من العمر تدعى 'عنود'، واحتياجها إلى 71 غرزة لإنقاذ حياتها.
وقالت صاحبة الحساب، التي تعد شاهد عيان على الحادث، في منشور مطول: 'أنا يمكن أو مرة اكتب حاجة زي كدا، أو انزل بوست زي دا، بس لازم اعمل كدا عشان دي مش صاحبتي بس، دي أكتر من أختي'.
تفاصيل بشعة
وأضافت: 'دي بنت اسمها عنود، كانت ماشية مع واحدة تانية صاحبتنا، وحصلت مشكلة صغيرة ما بينها وبين بنت اسمها جنا، والموضوع عدا، ولا حصل أي حاجة، وفجأة عنود لقيت خالتها بتتصل بيها، تقولها تعاليلي في المحلية الخامسة، بالتجمع الثالث، نفس المكان اللي عنود والبنت جنا حصل فيها المشكلة التافهة بينهم، واللي متستحقش أي حاجة'.
وتابعت: 'عنود كانت في أرابيلا بلازا، وراحت لخالتها، اللي كان معاها إخوات عنود الاتنين، وسابتهم ونزلت تجيب حاجة من السوبر ماركت، فطلعت لقت ناس واقفين معاهم، جريت تشوف في إيه لقت أم جنا واتنين كمان، وواحدة اسمها (ج) واختها و بنت محجبة كمان، واقفين وبيقولوا لخالة عنود إحنا عايزين عنوانها، أو رقم مامتها، فالخالة اتصلت بعنود وطلبت منها الحضور، متصورة أنها عملت حاجة للبنت دي، وعنود أول ما راحت دخلت بتقول لأم (ج) حضرتك يا طنط.. ولسة مكملتش الجملة راحوا الـ3 ستات مقطعين وشها ورقبتها'.
وواصلت صاحبة الحساب على إنستجرام: 'أنا مش عارفة أقول إيه بجد؟! كلنا كنا فاكرين إن الكلام دا بيحصل في الأماكن الشعبية بس، وكمان مش بالبشاعة ولا قسوة القلب دي، ماظنش إن في أي سبب أو داعي يخلي 3 ستات عندهم أولاد يعملوا كدا في بنت من دور ولادهم، عنود مصعبتش عليهم؟! ولا على أي حد من اللي كانوا واقفين في الشارع، ولا أي حد خالص؟! الكلام دا حصل في التجمع الثالث، المحلية الخامسة عند السندس بعد الإفطار، في حدود الساعة 9.30'.
وقالت صاحبة الحساب: 'الناس اللي علموا كدا في عنود بيقولوا إنها خرابيش، وفي احتمال إنهم يخرجوا من السجن، والله أعلم ممكن يعملوا كدا في مين تاني؟! وللعلم ضهر عنود واخد 50 غرزة، ودراعها واخد 17 غرزة، وعند شراينها 4 غرز، إقنعوني إزاي دي خرابيش، يعني كله على بعضه 71 غرزة، إزاي بنت عندها 16 سنة لسة معاشتش أي حاجة في سنها، يحصل فيها كل دا؟!'، كل اللي احنا عايزينه حق عنود، والناس دي متخرجش'.
تابعوا آخر أهل مصر على Google News
