تقدم أولياء أمور مدرسة حسام الدين بشارع العشرين فيصل، باستغاثة إلى الدكتور طارق شوقي وزير التربية والتعليم والتعليم الفني، ضد إدارة المدرسة بسبب امتناعهم عن تسليم الطلاب أمس، لأولياء الأمور بعد انتهاء اليوم الدراسي، وحدوث مشاجرات وتزاحم بين أولياء الأمور وإدارة المدرسة.
ورصدت "أهل مصر" بعض أراء أولياء الأمور حول ما حدث بالمدرسة.
وقال حساب يحمل اسم شيرى زيدان، 'إن مدير المدرسة رفض أي واحدة معاها طفل صغير تدخل المدرسة وتستلم ابنها فبتالي الناس فضلت واقفة مستنية تاخد عيالها من الساعه ١٢ونص لحد ٢ وفي الأخر أولياء الأمور طلبوا الشرطة واستلموا أولادهم بمحضر، وكان بيزعق لناس ويقول أنا معايا حصانة لأنه عضو مجلس الشعب'.
وقال محمود صادق ولي أمر طالب بالمدرسة، 'مراتي راحت تاخد ولادي من المدرسة ميعاد خرجوهم الساعه 12.15 من الباب إلى جنب موقف العربيات بتاع الشارع، وفضلوا يقولوا لا الباب التاني لا اللي بعده من 12.15 حتى الساعه 1.30 لم تستطع أن تستلم الولد طبعا تزاحم على باب المدرسة بدون كمامات ولا حاجه أكتر من 80 ولي أمر واقفين ومراتي شيله ابني 6 شهور وبنتي اللي في سنة أولى ابتدائي من الساعه 12 وبعد فقد الناس أعصابها وقلقها على الولاد بدأوا يزعقوا، طلع الاستاذ مندوه الحسيني ليلفظ بكل لفظ يسيئ للمدرسة والمنظومة التعليمية بالكامل ويقول لأولياء الأمور مفيش عيال طب هات الكارنيهات بتاعتهم يرد مفيش عيال ولا كارنيهات واتفضلوا اعملوا اللي انتوا عاوزينه احنا معانا حصانة هيا دي ثقة الناس اللي اختارتك طب اللي مش عارف ياخد حقه منك من مدرسة بيدفع فيها دم قلبه لولاده مين هياخد حقه منك كنائب في مجلس الشعب، لحد مادخل ولي أمر بالقوه لفت مراتي وعدد من السيدات المحترمين لرسبشن للمرة السادسة لقت الراجل طالع مبهدل وكل الناس بتتحايل عليه وتقوله معلش ياعالم حصل معاه ايه جوه وأنا زوجتي انهارت هيا وناس تانية في الأخر تكرمت واحدة من الموظفين وراحت جابت الولد الساعه 2:10 لاقته اليونيفورم متبهدل وقالها أنا قاعد من بدري من الساعه 12 ليه سيباني جعان وتعبان حرام عليكي يرضى مين ده بالله عليكم'.
اولياء امور مدرسة بفيصل
ونشر حساب على الفيس بوك يحمل اسم نور الهدى، 'كنت واقفة في منتهى الاحترام الباشا المندوه هو اللي حب يعمل نمرة قدام الناس والعمال وماكنش ليه لازمه اللي اتعمل كله هو استفز الناس كلها، انا واخده بنتي الساعة ١/٤٥ بالعافية' .
وقال حساب أخر باسم أميرة خضر ولي أمر، أنا مامت ولد منهم أحنا اتصلنا بالنجدة واستلمنا ولادنا في محضر شرطة، بيقولي ودي ابنك في داهية وملكيش ولاد عندي واعملي اللي تعمليه ومكنش راضي يسلم الولاد للشرطة كمان وعاوزنا إحنا نمضي إقرار رفضنا وقلنالهم إحنا خلاص اطمنا على ولادنا خليهم عندكم مش هنستلم ولادنا بدون الكارنيهات وبدون محضر بهدلنا وشتم الناس وضرب أم طفل، والله مكنش بيتكلم بلسانه كان بيزق فينا بغل وأنا واحدة من الناس رجلي اتزنقت في البوابة الحديد وقالهم اقفلوا الباب علي رجلها كانت هتتكسر لولا الناس زقوا الباب وخرجوني.
ولى أمر
وعلق حساب يحمل أسم جهاد محمود ولى أمر: 'أنا الأم اللي مكانتش عارفة توصل لابنها أنا كان ممكن استني ساعتين تلاته مش مشكلة لو هما لسه في الفصول بيدرسوا أو بيمتحنوا لكن ابني يبقى قاعد في الجاردن من 12.20 لحد 2.15 لييييه، وانا مستنياه بره والباشا مش راضي يدخلني وزقينا الباب كتير ودخلنا بالقوة واتخانقنا وزعقنا، وفي راجل حاول يتكلم معاه بكل احترام في الأول رد عليه بنفس اللفظ كده وقاله: مهما بصتلي وبرقتلي والله مانت داخلها ولا يهمني.. المدرسة دي مفتوحه بفلوسنا وفي ناس راحة القسم فعلا وكنت رايحه بالفعل لولا أن واحدة من الاستقبال قالتلي انا هجيبلك ابنك بس متتعصبيش علشان البيبي اللي ع دراعك وحاجة غريبة إن معظم الأطفال اللي خارجين كانو بيعيطوا فلما سألت ابني بعد ماطلع وشكله وهدومه متبهدله وتراب قالي عمو الكبير أبو بدله ده كان بيزعق أوي واحنا خايفين وبقالنا كتير قاعدين وزهقنا من الساعه 12 وتلت'.
وتحاول 'أهل مصر' التواصل مع الدكتور طارق شوقي وزير التعليم، وإدارة المدرسة لمعرفة ملابسات الواقعة.
تابعوا آخر أهل مصر على Google News
