مظهر شاهين: بنتي قررت تلبس الحجاب وأنا رفضت

رفض الشيخ مظهر شاهين، إمام مسجد عمر مكرم السابق، اليوم الثلاثاء، ارتداء ابنته الحجاب في هذه السن الصغيرة.

وقال 'شاهين'، في منشور له عبر صفحته الرسمية على موقع التواصل الاجتماعي 'فيس بوك': 'أرفض إن بنتي تتحجب دلوقتي، عارفين ليه؟ لأنها لازالت طفلة'.

مظهر شاهين: بنتي قررت تعملي مفاجأة في اليوم ده تفرحني بيها

وتابع: احتفلنا بالأمس بعيد ميلاد ابنتي ، ولأنَّي معَوِّد أولادي علي المفاجآت اللي تفرحهُم، همَّ كمان بيحبوا يعملوا لي مفاجآت تفرحني، المُهم،، بنتي قررت تعملي مفاجأة في اليوم ده تفرحني بيها ، فكَّرِت وفكَّرِت ثم قرَّرَتْ أن ترتدي الحجاب ، وبالفعل لقيتهَا حاطة إيشارب علي راسها وهي فاكرة إن دي مفاجأة حلوة هفرح بيها، إلا أنَّنِي فاجأتُها بإنِّي رافض إنها تتحجب دلوقتي، قلتلها الحجاب جميل يا حبيبتي وربنا بيحبُّه لكن إلبسيه لما يبقي سنك ١٣ سنة، أو لمَّا ماما تقولك، عشان تعيشي طفولتك وتشبعي بيها.

مظهر شاهين: أنا حابب إن بنتي تعيش وتفرح بطفولتها

وأضاف: 'بنتي ماشاء الله أتمت عامها التاسع، أنا حابب إنها تعيش وتفرح بطفولتها بدون أي قيود، ويوم ما تتحجب تتحجب وهي عاوزه كده وفاهمه يعني إيه حجاب، مش عشاني أنا، وسبحان الله لما أنا فكرْت وجدْت إن ربنا سبحانه وتعالي عاوز كده ، ربنا عاوز الأطفال يفرحوا ويمرحوا بدون أي قيود، عشان كده رفع القلم عنهم ومش بيحاسبهم علي أفعالهم لحد ما يوصلوا لسن البلوغ، ساعتها بيبقوا مكلَّفين وبيتحاسبوا علي تصرفاتهم، بدليل قول النبي صلى الله عليه وسلم: «يَا أَسْمَاءُ إِنَّ الْمَرْأَةَ إِذَا بَلَغَتِ الْمَحِيضَ لَمْ يَصْلُحْ أَنْ يُرَى مِنْهَا إِلَّا هَذَا وَهَذَا، وَأَشَارَ إِلَى وَجْهِهِ وَكَفَّيْهِ». رواه أبو داود.

واستكمل الداعية الإسلامي: ويقول صلوات الله وسلامه عليه: «لاَ يَقْبَلُ اللهُ صَلاَةَ حَائِضٍ –من بلغت سن المحيض– إِلاَّ بِخِمَارٍ».. [رواه الخمسة إلا النسائي]، ويقول فضيلة الإمام الأكبر شيخ الأزهر، خلال الحلقة الثانية والعشرين من برنامج «الإمام الطيب»، إنه يمكن تربية الأطفال على مبادئ الإسلام من الصدق، والأمانة، وتحمل المسئولية، وغير ذلك، وأشار إلى أن حجاب المرأة المسلمة فرض على كل من بلغت سن التكليف، وهي السن التي ترى فيها الأنثى الحيض.

الإفتاء المصرية: إن حجاب المرأة المسلمة فرض على كل من بلغت سن التكليف

وأضاف: تقول دار الإفتاء المصرية إن حجاب المرأة المسلمة فرض على كل من بلغت سن التكليف، وهو السن الذي ترى فيه الأنثى الحيض، وهذا الحكم ثابت بالكتاب والسنة وإجماع الأمة.

مظهر شاهين: نحاول نمنح أبنائنا أطول وأكبر فرصة مُمكنة يعيشوا بيها طفولتهم

واستطرد: طبعا مفيش مانع إننا نبدأ نعودهُم وندربهُم ونكلمهُم عن الصلاة والحجاب والصوم وفرائض الإسلام قبل سن البلوغ بحاجة بسيطة، لكن نحاول نمنحهم أطول وأكبر فرصة مُمكنة يعيشوا بيها طفولتهم، عشان وقت ما يبقوا مكلَّفين ويلتزموا يبقوا مش حاسين بإنهم اتحرموا من حاجة يفضلوا يبحثوا عنها طول عمرهم.

ساعدوا أولادكم إنهم يعيشوا طفولتهم ويفرحوا بيها وفيها علي قد ما تقدروا، وربنا يفرحكم ويفرحنا بيهم، ويبعد عنهم كل شر.