طارق العوضي يناشد وزارة الداخلية بسبب فتاة تعرضت للضرب والتعدي من شقيقها

نشر طارق العوضي، المحامي بالنقض، استغاثة فتاة بوزارة الداخلية، وذلك من أفعال شقيقها والتعدي عليها بالضرب، والتحرش بها وسرقة مستلزمات تجهيزات زواجها بالكامل.

وقالت الفتاة في استغاثتها: «دي أول مرة في حياتي اكتب حاجة هنا عن حياتي الشخصية ويمكن معرفش أصيغ الكلام أو ارتبه كويس، أنا تم التحرش بيا بشكل بشع وصريح من أخويا في سنة 2017 كنت وقتها في ثانوية عامة ومن الصدمة فضلت شهر لا بتكلم ولا بخرج من البيت لمدرسة أو دروس واتفصلت من المدرسة وقتها بسبب الغياب والنتيجة أن سقطت ف مادتين وأنا مقدرتش اتكلم وقتها ولا كنت عارفة أعمل أيه أو اقول إيه ولأنه كان عارف اللي عمله كان كل شوية يجي يسألني مالك حد زعلك او انا زعلتك عشان يبعد الشبهه عنه قدام بابا وماما ..وللأسف انا كملت ف السكوت وقتها فترة كبيرة وعشان سكت اتجرأ عليا اكتر وضربني ف مرة بعد واقعة التحرش ب ٦ شهور وقتها قولت لماما اللي حصل ولما واجهته قدامها اتهمني بحاجات بشعة .. وأنا غلطت إني فضلت ساكتة السنين دي كلها».

وتابعت الفتاة في استغاثتها: أنا بقدم بلاغ رسمي بواقعة التحرش، وحالياً هو مدمن آيس و بودرة ومن بعد وفاة بابا وهو قاعد ف البيت وماما اللي بتصرف عليه وقبل العيد بإسبوع كان ف اوضتين ف البيت مقفولين بمفتاح فيهم جهازي ف واحدة منهم عرف يسرق مفتاحها من ورانا والتانيه كسر كالون الاوضة وسرق كل اللي فيهم ف وقت كنت انا وماما برا البيت ..سارق حاجات بقيمة ٢٥٠ الف جنيه وكان عامل كل ده وكان قاعد واكل شارب معانا وماما هي اللي اكتشفت السرقة و اول ما اكتشفتها جري وهرب و ماما عملت بلاغ بالسرقة وف حد جه عمل معاينة ولكن مفيش اي فايدة ولا اي حد اتحرك وكل يوم كان بيبعتلنا حد من قرايبنا واتفقنا اننا هنعالجه وبالفعل ماما راحت معاه لحد المصحة وأول ما وصلوا سابها وهرب واختفي من المكان وبالمناسبة دي مش اول مرة نعالجه دخل قبل كدة مصحة خاصة ف اخر ٢٠٢٣ وصرفنا فوق ال ١٠٠ الف ع علاجه وطلع و رجع تاني للآيس وكل انواع المخدرات

واستكملت: «ولما قولنا للناس اللي اتدخلت انه مش هيدخل البيت تاني حصل زي ما ف الفيديو كل يوم بيجي تحت البيت يتهجم علينا بأبشع الكلام وبيبقي هيكسر البوابة علينا .. وانا ماما ف البيت لوحدنا و الفيديو ده كان الساعة ٤ انهاردة اتصلنا بالنجدة وقالولنا هيبعتولنا حد ولا اي حد جه ولا اتكلم وقاعدين لا عارفين نخرج ومحبوسين ف البيت ومهددين طول الوقت وعايشين ف رعب، كل اللي حكيته ده نقطة ف بحر الأذي اللي الشخص ده أذاه ليا انا وماما».

واختتمت استغاثتها قائلة: «أرجوكو أي حد يشوف البوست يشيره ويساعدني ان البوست يوصل لوزارة الداخلية وأن الشخص ده يختفي من حياتنا لأني معرفش ممكن بعد كدا يحصل ايه»