سادت حالة من الغضب والانهيار الشديد بين طلاب الثانوية العامة عقب أداء امتحان مادة الكيمياء، حيث اشتكى الطلاب وأولياء أمورهم من صعوبة الأسئلة وضيق الوقت، وحالة التوتر والضغط العصبي داخل لجان الامتحانات بسبب المراقبين.
وكشفت إحدى الطالبات عن تفاصيل الأزمة التي واجهتها هي وزميلاتها داخل اللجنة، قائلة: "الامتحان كان وحش وصعب جدًا، والوقت مكنش كافي خالص.. يعني المراقبين كل شوية يدخلوا يتكلموا في اللجنة، ويقعدوا جنبنا.. طب ما أنتم بتعطلونا، وبنات الورق بتاعها باظ وعايزين يغيروه، والمراقبين بيرفضوا ويوترونا ويقولوا هنعمل محضر، طب ما كل دا محسوب من وقتنا إحنا".
وتابعت الطالبة في حديثها خلال فيديو مع "أهل مصر"، عن أزمة التوقيع على كشوف الحضور التي تستهلك جزءًا كبيرًا من زمن الامتحان قائلة: "التوقيع بياخد من وقتنا حوالي نص ساعة، كل شوية مراقب يدخل يوقعنا، ودا كله محسوب من الوقت بتاعنا، فإحنا كبنات هنعمل إيه أصلاً؟ يعني ما فيش وقت كافي للحل، ومن كتر التوتر في بنات عمالة تموت وتتعب جوة، وأهاليهم واقفين برة تعبانين وخايفين يجرى ليهم حاجة."
وعبرت الطالبة عن الضغوط النفسية الكبيرة التي تواجهها: "الثانوية العامة بقت مقرفة بسبب ضغط الأهالي والمدرسين والمجتمع عموماً.. أصلاً إحنا في مجتمع أي حد بيفشل فيه خلاص بيبصوا له على إنه فاشل ضاع، الامتحان جاي فيه أفكار عالية كتير وفوق مستوى الطالب المتفوق، والمراقبين ورئيس اللجنة جايين عشان يثبتوا حالة بس، طب إحنا ذنبنا إيه توترونا والوقت بتاعنا يضيع؟".
جدير بالذكر أن شكاوى امتحان الكيمياء تصدرت منصات التواصل الاجتماعي، وسط مناشدات مستمرة من أولياء الأمور لوزارة التربية والتعليم بمراعاة صعوبة الامتحان أثناء التصحيح وتوزيع الدرجات رأفة بمستقبل الطلاب.
تابعوا آخر أهل مصر على Google News
