تواصل 'أهل مصر' نشر نص تحقيقات النيابة مع المتهم بقتل شقيقه التؤام فى قرية الأخماس التابعة لقرية إسحاقة بمركز ومحافظة كفر الشيخ، وذلك بعد أن حدثت مشادة كلامية بينهما تطورت لمشاجرة طعن فيها المتهم شقيقه التوأم بسلاح أبيض 'سكين' طعنة نافذة بالقلب، دخل على إثرها لمستشفى كفر الشيخ العام، ليتوفى متأثرا بإصابته داخل العناية المركزة بالمستشفى بعد يومين من مكوثه بها.
وجاء فى نص تحقيقات النيابة مع المتهم فى تلك القضية إنكاره ارتكابه للجريمة، وأنه كان يدافع عن نفسه فيما قام توأمه بطعن نفسه ب 'السكين' وذلك وفقا لما ذكره المتهم فى التحقيقات، وإلى نص التحقيقات:
س: أنت متهم بقتل المجنى عليه طلحة عمدا مع سبق الإصرار والترصد بأن بيت النية وعقدت العزم على قتله بأن أعددت أداة 'سكين' وانتظرت حتى تمكنت منه وما أن ظفرت به حتى قمت بضربه بتلك الأداة قاصدا من ذلك قتله على النحو المبين بالأوراق؟
ج/ الكلام ده محصلش هو اللى كان معاه السكينة وخبط نفسه.
س: أنت متهم بحيازة سلاح أبيض 'سكين' بدون مسوغ قانونى أو مبرر من الضرورة المهنية أو الحرفية؟
ج/ محصلش
س: ما الذى حدث إذا وما هى ظروف ضبط وإحضارك وعرضك علينا؟
ج/ اللى حصل إن مات أخويا بتطلع عليا كلام وبتقول على مراتى إنها .... وكمان بتعمل لى أعمال وبتقول أنا مش هخلى واحدة تعمر معاك فى البيت علشان فى الأول وفى الأخر الأرض والبيت يكونوا بتوع ولادى، ويوم السبت اللى فات سمعتها عمالة تقول تشتم على مراتى بكلام وحش فأنا روحت لأخويا علشان أعتب عليه وأقول له احنا ملناش غير بعض وبعد كده قولت له لو ملمتش مراتك عن مراتى أنا هزعلها وبعد كده لقيته دخل شقته وطلع تانى وطلع سكينة من بنطلونه لونها أخضر وحاول يضربنى بيها وأنا قولت له يا ابنى ليه كده احنا هنضيع نفسنا، وفضل يهوش بالسكينة وعورنى فى دراعى الشمال بيها وبعد كده أنا مسكت إيده علشان أحوش عن نفسى فهو قام ناتش السكينة مرة واحدة وأنا قمت ماسك فى دراعه وبزقه عشان ميضربنيش بالسكينة وهو نتش ايده مرة واحدة دخلت فى صدره ولما لقيته كده أنا طلعت أجرى وأنادى عل حد يلحقه وملقتش حد وبعد كده أنا طلبت الإسعاف عشان يجوا ياخدوه وهو ده اللى حصل.
س: وهل حاولت إسعاف المتوفى إلى رحمه مولاه حال إصابته؟
ج/ أنا طلبت له الإسعاف وبعد كده أنا هربت.
س: وما هو سبب هروبك؟
ج/ أنا خوفت يقولوا أنا اللى قتلته.
س: أين يتواجد السلاح الأبيض المستخدم فى إحدث إصابة المتوفى إلى رحمه مولاه؟
ج/ أنا معرفش هى كانت مع أخويا اللى مات.
س: وما هو رقم الهاتف الذى قمت بالاتصال منه على الإسعاف؟
ج/ أنا اتصلت من تليفون واحد كان على الطريق بس أنا معرفش هو مين.
س: وما هى مواصفات الهاتف المحمول الذى قمت بإجراء الاتصال منه؟
ج/ أنا معرفش
ما قولك فيما أقرته وشهدت به زوجة شقيقك استدلالا وبتحقيقات النيابة تلوناه عليه؟
ج/ الكلام ده محصلش
س: ما تفصيلات إصابتك؟
ج/ زى ما قولت قبل كده لما شديت مع أخويا طلحة فى الكلام دخل وجاب سكينة من شقته وأنا كنت بحوش عن نفسى هو خبطنى بالسكينة على دراعى وكان بيحدفنى بالطوب.
س: هل كان بحوزة سالف الذكر أية أسلحة أو أدوات؟
ج/ أيوه، كان معاه سكينة وطوب.
س: هل قام سالف الذكر باستخدام تلك الأسلحة أو الأدوات تحديدا؟
ج/ هو حدفنى بالطوب وضربنى بالسكينة.
س: أين استقرت تلك الضربات بجسدك تحديدا؟
ج/ هو حدفنى بالطوب فى كل جسمى وضربنى بالسكينة على دراعى.
س: وما هى طبيعة الأرض محل حدوث الواقعة من حيث الضوء والرؤية والمسافة الفاصلة بينكما؟
ج/ كنا عالسلم بتاع البيت ومكنش فيه مسافة بينا خالص وكنا قبل المغرب.
س: من تتهم تحديدا بإحداث إصابتك
ج/ أنا بتهم طلحة.
س: وما قصده من ارتكاب تلك الواقعة تحديدا؟
ج/ أنه يضربنى.
س: هل حاولت رد الاعتداء الواقع عليك؟
ج/ لا.
س: هل لديك أقوال أخرى؟
ج/ لا.
تابعوا آخر أهل مصر على Google News
