طالبة تتهم أستاذة جامعية بمحاولة خنقها والتعدي عليها بالمنوفية (صور)

تداول عدد من رواد موقع التواصل الاجتماعي 'فيس بوك' منشورًا لطالبة تُدعى 'ميار صلاح' تدرس بجامعة السادات في محافظة المنوفية، تتهم دكتورة جامعية بمحاولة خنقها والتعدي عليها داخل وسيلة مواصلات مدينة السادات المُتجهة لمحافظة الإسكندرية، وقامت بتحرير محضر بالواقعة رقم 20884 بمركز السادات.

الطالبة 'ميار صلاح'

موقف مدينة السادات

وروت الطالبة في منشورها المتداول تفاصيل الواقعة، قائلة: 'الكلام دا حصل في موقف مدينة السادات وأنا راجعة من جامعتي ركبت وهي كانت فيةالكرسي اللي ورايا هي ومامتها وكانوا بياكلوا

فأنا قدامهم بلم شعري راحت هي ومامتها زقوني في ضهري وقالولي أحنا بناكل شعرك دخل فالأكل فقولتلها معلش أنا بلمه أصلا أهو، قالتلي يعني إيه معلش وبتلميه ماهو جيه في الأكل خلاص قولتلها طب أعمل إيه أكتر من إني ألمه؟'.

وتابعت الطالبة: 'مامتها قالتلي انتي بتكلميها كدا ليه انتي متعرفيش هي مين دي دكتورة في الجامعة على فكرة، قولتلها أهلا وسهلا أنا مش بتعرف عليها أنا مجتش جمبكم أنا معملتش حاجة مامتها ردت قالتلها بعد ما الاتنين قعدوا يردحولي شوية تحت شعار (انتي متعرفيش إحنا مين ولا عيلتنا مين) إني قليلة الأدب وأمي وأبويا مربونيش فأنا قولتلها وانتوا مش محترمين لما تعملوا كل دا وأنا مجتش جنبكم ومسكت تليفوني وبصيت قدامي لقيت الدكتورة اللي معرفش إزاي دكتورة في الجامعة بتخنقني من رقبتي من ورا لحد ما نفسي كان بيتقطع والناس كلها موجودة ومحدش كان قادر عليها ولا قادر يشيل إيديها من رقبتي لحد ما السواق شدها ونزلها والركاب شدوني من إيديها بعد ما سلسلتي الدهب اتقطعت وقولتلها أنا هروح أعمل محضر بكل دا

قالتلي اعملي اللي تعمليه كدا كدا أنا دكتورة في الجامعة'.

صورة الطالبة

واستطردت: 'اتصلت بالنجدة وجات والسواق كان عايز يمشيها بس أنا فضلت واقفة لحد ما أمين شرطة جيه وقالولي أروح أعمل محضر وهي هتروح القسم ورايا وهتعمل محضر هي كمان وأول ما مشيت طبعا ركبوها ومشوها عادي ولا كأنها عملت حاجة.. طبعا أنا حررت محضر وتقرير طبي بعد معاناة في القسم لإني مكنتش أعرف هي مين غير أنها دكتورة في الجامعة ومعايا الصور والفيديو اللي صورتهم لها'.

صورة الطالبة

واستكملت الطالبة: 'إزاي دي دكتورة في جامعة كبيرة زي إسكندرية؟ إزاي محدش كان قادر عليها وكانت هتموتني لإني بالفعل عندي مشكلة في صدري وبيجيلي أزمة ونفسي اتقطع وفي الآخر مشوها؟

كان المفروض أموت الأول وبعدين تطلعوا تقولوا عليا قليلة الأدب زي كل البنات اللي عماله تتقتل دي والحوادث اللي بتحصل!.. حسبي الله ونعمل الوكيل وأنا مش هسكت على حقي وأديني عملت المحضر ومستنية أشوف هيتركن على الرف ولا إيه اللي هيحصل'.

منشور الطالبة