رداً على الأشخاص الذين يسخرون من مجهود وزارة الصحة في مواجهتها لفيروس كوورنا المستجد، علق جلال الشيشيني معاون وزيرة الصحة ونائب رئيس حملة 100 مليون صحة قائلا:'مش هقولك تعالى شيل ربع احنا اللى احنا شايلنه، ولا حتى في ربع الظروف وأضعاف الإمكانيات دي، ولا حتى من غير ضغط وسخرية الناس منك ليل ونهار، ولا، ولا، ولا”.
وأضاف 'جلال الشيشيني' في تدوينة له عبر صفحته على موقع التواصل الاجتماعي 'فيسبوك'، 'هقولك بس استحمل تمسك سماعة التليفون وتتصل بمواطن تبلغه نتيجة التحليل وتطلب منه يجهز في خلال ربع ساعه علشان يتنقل حالا لمستشفى العزل، علشان يتلقى الرعاية أولا ونمنع العدوى ثانيا، المكالمة مجهولة إنت مش عارف مين هيرد عليك ولا ظروفه الاجتماعية والنفسية عاملة إزاى، ولا هو أصلا مرعوب من هوس الإعلام، ولا واخد الموضوع هزار وقشطة'.
وفي موقف تقشعر له القلوب، استكمل 'الشيشيني' حديثة قائلا: 'أم سكتت لمدة 10 ثوانٍ وقالت لي بس والنبي في صمت مش عاوزة ولادي يتعرضوا للتنمر من الجيران، وأب قالي طيب خليني للصبح حتى أشبع من ولادي و(كأنه لا قدر الله بعد الشر مش هيشوفهم تاني)، وواحدة عرفت من المكالمة معاها إنها حامل، وطفل أمه صممت تتعزل معاه حتى لو هتتعدي، وزوجة ما خدهاش من حضن جوزها اللى هيتعزل غير الطاقم اللي مسئول عن نقله، واللى مسلم أمره لله ويرد يقولي طيب المستشفى فين وأنا أجيلكم أسهل..، واللى عاوز لاب توبه بس معاه علشان يخلص البيزنس بتاعه، والمصاب اللي سكت وقال حالا هنعزل، بس بالله عليكم بنتي سخنت إمبارح ابعتوا فريق يسحب عينة ويطمن عليها.. والزوج اللى كلمته 2 بليل صحى مراته يبلغها الخبر قلتله لأ ثانية واحدة، هي كمان إيجابي هتجهزوا وتنعزلوا سوا دلوقتي'.
وتابع، 'رقم 80 حالة بتاع النهاردة مش رقم، ولا عدد، دول 80 أسرة و80 روح و80 قصة وحكاية و80 سيناريو وسبب عدوى مختلف ، اللي كان مسافر واللى من أخوه واللي من أبوه، واللى أكل عيشه من السياحة والتعامل مع الأجانب، هيعمل أيه ما لازم ينزل شغله ويسافر كل شوية واللى واللى، الطف بيهم يارب من المرض والظروف، والطف بيهم من تنمر الناس حواليهم، وهون على كل أسرة منهم غياب فرد لمدة 14 يوم أم ولّا أب ولّا ابن'.
وأضاف: 'محدش يستهون باللي بتقوله ونعيده، اغسلوا أيديكم كل شوية، وكافحوا العدوى من العطس والكحة ، الأب اللي عدى ابنه كان بيعطس عادى على فكرة وبيهزر وبيألش برضه زينا عادي، وميعرفش أنه مصاب ولا أنه اتسبب في عدوى لابنه، حافظوا على نفسكم علشان ربنا يحافظ علينا كلنا، صحتنا مسؤوليتنا كلنا مش مسؤلية دولة ولا وزارة بس، أكبر الدول اتهزت من فيروس أصغر من حبة السكر ، المرض مالوش كبير والدولة والوزارة هي احنا برضه على فكرة مش مستوردين من برا'.
وأشار: 'بدل ما تنزل صورة سخرية وتهزيق في وزارة الصحة ، نزل صور غسيل الأيدي، ومكافحة العدوى، نزل معلومات عن الارشادات والعزل المنزلي لو لا قدر الله اختلطت بحد إيجابي أو حتى عنده أعراض الإنفلونزا، اهو منها علم وصدقة، ومنها بتساعد في نشر الوعي والتوعية، ومنها بتشجعنا وتقوينا أننا مش لوحدنا وفي ضهرنا شعب بيحافظ على بلده ، زي ما المسؤولين في بلده بيسهروا بالأيام والليالي يحموك ويحافظوا على صحتك'.
وأوضح: 'صفحة الوزارة وصفحة منظمة الصحة في مصر فيهم مواد غنية أقروها واحفظوها والخط الساخن 105/24 ساعة هيستقبل استفسارات وبلاغات، في ظل اليوم اللى البلد كلها إجازة مفيش موظف واحد من الفرق دي اخد إجازة علشان مستخسر يكون في أيديه حاجة يعملها علشان ميزدوش حالة واحدة، احفظنا كلنا يارب، وطمن أهل الـ80 أسرة دول، وارحم السيدة إلى اتوفت النهاردة وصبر أهلها ورجع باقي الناس لأسرهم وحياتهم سالمين متعافين يارب'.
وكانت قد أعلنت وزارة الصحة ، عن خروج 12 حالة من مصابي فيروس كورونا المستجد من مستشفى العزل من إجمالي الـ27 حالة التي تحولت نتائج تحاليلها من إيجابية إلى سلبية لفيروس كورونا (كوفيد-19)، وذلك بعد تلقيهم الرعاية الطبية، وتمام شفاءهم وفقًا لإرشادات منظمة الصحة العالمية، ليرتفع إجمالي المتعافين إلى 20 حالة حتى اليوم.
وأوضح الدكتور خالد مجاهد مستشار وزيرة الصحة والسكان لشئون الإعلام والمتحدث الرسمي للوزارة، أن الـ 12 حالة التي غادرت مستشفى العزل اليوم، من ضمنهم 7 مصريين و 5 حالات لاجانب من جنسيات مختلفة.
وأشار إلى تسجيل 13 حالة جديدة ثبتت إيجابية تحاليلها لفيروس كورونا المستجد، اليوم، من بينهم 6 حالات بدون اى أعراض، وهم من المخالطين للحالات الإيجابية التي تم اكتشافها والإعلان عنها مسبقًا، وجاء ذلك ضمن إجراءات الترصد والتقصي التي تجريها الوزارة وفقًا لإرشادات منظمة الصحة العالمية، موضحا أن الحالات من ضمنهم 10 مصريين و3 حالات لاجانب من جنسيات مختلفة، لافتًا إلى أن هناك حالة من ضمنهم توفيت اليوم.
وقال مجاهد، إن حالة الوفاة هي لسيدة مصرية تبلغ من العمر 60 عامًا من محافظة الدقهلية، حيث استقبلتها مستشفى صدر المنصورة وهى تعاني من التهاب رئوي حاد صباح أمس الأربعاء، وعلى الفور تم سحب عينة لها وجاءت النتيجة إيجابية لفيروس كورونا المستجد، وتم نقلها إلى مستشفى العزل، وتوفيت اليوم.
وكشف مجاهد عن إجمالي عدد المصابين الذين تم تسجيلهم في مصر بفيروس كورونا المستجد حتى الآن هو 80 حالة من ضمنهم 20 حالة تم شفاءها وخرجت من مستشفى العزل، وحالتين وفاة فقط' حالة السيدة المصرية التى توفيت اليوم، والأخري للالماني الذى توفي يوم الأحد الماضي الموافق 8 مارس'.
تابعوا آخر أهل مصر على Google News
