انتقد أحمد حسام ميدو، نجم الزمالك السابق، سيد عبد الحفيظ، مدير الكرة بالأهلي؛ بسبب رفضه للممر الشرفي الخاص بنهائي كأس مصر والذي انتهى بفوز الزمالك بهدفين مقابل هدف.
وقال ميدو في تصريحاته عبر برنامج الريمونتادا على قناة المحور: «أوجه التحية لسيد عبد الحفيظ على تصريحاته بشأن عدم تقبله للإهانة، وبقول له إنت كدة راجل دكر، أي حد لازم لازم يرفض الإهانة».
وأضاف ميدو: «كان نفسي إن سيد عبد الحفيظ، يحترم البروتوكول اللي أقره اتحاد الكرة المصري، واللي بيتمثل في الممر الشرفي وعلى فكرة البروتوكول ده مبعوت من اتحاد الكورة، مش مبعوت من نادي الزمالك، اتحاد الكرة بعت من قبل الماتش للأهلي والزمالك البروتوكول ده عشان نصدر صورة جميلة للكرة المصرية تُمثل الروح الرياضية للوطن العربي».
وواصل ميدو: «فكرة إن الممر على المزاج زي ما قال سيد عبد الحفيظ مش داخلة دماغي وانت المفروض تكون فرحان بالفكرة حتى لو متعملتش قبل كده».
وتابع نجم الزمالك السابق: «الممر الشرفي يا كابتن سيد، نادي الزمالك بتاريخه هو اللي عاملهولك، احتراما للنادي الأهلي ولتاريخه، واحتراما للعلاقات القوية بين الناديين، لكن رفضك الدخول في ممر شرفي ده مينفعش يتعمل من مدير كورة يا كابتن سيد وهذا عتابي عليك».
وختم ميدو حديثه قائلا: «لو كان الأهلي كسب كان الزمالك هيدخل بكامل أعضائه في الممر الشرفي، أنا مع سيد عبد الحفيظ قلبا وقالبا في عدم تقبل الإهانة، ولكن عتابي عليه أنه لا علاقة للممر الشرفي بأزمتك ومشكلتك مع مرتضى منصور».
تابعوا آخر أهل مصر على Google News
