هاجم طارق حامد، لاعب خط وسط فريق اتحاد جدة، إدارة نادي الزمالك، بسبب حديث مرتضى منصور، رئيس الزمالك، ضده حول رفضه التجديد للفارس الأبيض من أجل الأموال.
وقال طارق حامد، خلال تصريحات عبر فيديو نشره عبر صفحته الرسمية على «فيس بوك»: «حابب أوضح موضوع سفري للعلاج في إسبانيا عشان الجمهور مش فاهم المسألة كانت ماشية ازاي في ظل أخبار وتصريحات غريبة من إدارة الزمالك».
وأضاف طارق حامد: «في البداية أنا آخدت إذن من أمير مرتضى إني أسافر عشان أتعالج من الإصابة وكارتيرون ساعتها وافق، وبدأت مرحلة العلاج مع الخبير الإسباني، ولما جه فيريرا طلب مني إني أكون موجود في المعسكر باعتباري من كباتن الفريق».
وتابع لاعب الزمالك السابق: «بعدها سافرت تاني لـ إسبانيا عشان الخبير الإسباني مكنش ينفع يتابع معايا وأنا في مصر، وطلبت من النادي إذن، ومكنش مكتوب فيه مدة سفري هتكون قد ايه بالظبط».
طارق حامد: إدارة الزمالك قالت إني لاعب هارب
وواصل طارق حامد: «بعد لما خلصت مرحلة العلاج، إدارة الزمالك طلعت واتهمتني إن أنا كنت سبب خروج الفريق من دوري أبطال إفريقيا لأني لاعب متمرد وهارب، رغم إن ده محصلش».
واسترسل حامد: «إدارة الزمالك بلغتني إنها مش هتجدد لي عقدي، رغم إني كنت مستعد لده، بس طلبت منهم مهلة للتفكير في العرض، وده عكس اللي بيقولوه لوسائل الإعلام».
وأردف طارق حامد: «الزمالك في 2018 باعني لـ بيراميدز رغم رفضي.. ومع ذلك أصريت إني أكمل عشان خاطر الجماهير».
واختتم طارق حامد: «أنا بقول الكلام ده عشان خاطر الجماهير بس، إني طول عمري زملكاوي ومش هغير انتمائي أبدًا مهما حصل، أنا ميهمنيش إدارة الزمالك، لكن الجمهور اللي له فضل عليا هو المهم بالنسبة لي».
تابعوا آخر أهل مصر على Google News
