«فين مجهود الأهلي في إفريقيا»| أبرز تصريحات مرتضى منصور داخل نادي الزمالك

أطلق مرتضى منصور، رئيس الزمالك الصادر ضده قرار بعزله من رئاسة النادي، تصريحات نارية ضد الأهلي ولاعبه محمود عبد المنعم كهربا.

وعقد مرتضى منصور مؤتمرًا صحفيًا، اليوم الخميس، داخل نادي الزمالك، للحديث حول العديد من الأمور المهمة التي تخص القلعة البيضاء.

وجاء ملخص تصريحات مرتضى منصور كالتالي..

- أشكر أعضاء الجمعية العمومية، النادي مكنش فيه جنيه يوم الخميس الماضي واليوم دخلت ملايين في خزينة النادي.

- عملنا مبادرة مع وزير المالية علشان نرفع الحجز على ارصدة النادي ولكن ممدوح عباس رافض رفع الحجز.

- ممدوح عباس يتسبب في عدم دخول حساب النادي أي أموال.. أطالب ممدوح عباس بالترشح لانتخابات النادي و يوريني نفسه.

- لينا فلوس في صفقة مصطفى فتحي و سيف الجزيري وحتى الآن مش قادرين نستفيد منها بسبب ممدوح عباس.

- الأهلي مش هو اللي جاب الجون في الوداد وأتحدى أي حد يكون شاف الجون، احنا سمعنا الدوشة بتاعت الجول لكن محدش شاف الجون جه ازاي.

- عندنا في حساب النادي 100 مليون جنيه ومش عارفين نطلع منهم جنيه نجيب بيهم كلور لحمامات السباحة.

- سيف جعفر هيجدد العقد بكرة.. وخلصنا عقد سيف الجزيري.

- يا ريت عندنا أطهر الطاهر اللي ضيع ضربة جزاء الهلال السوداني، وبعدها جماهير الترجي تتخانق ويلعبوا بدون جمهور وأهم لاعب في الوداد يعمل عملية في القصر العيني قبل النهائي، هو فين مجهود الأهلي في البطولة.

- في الوقت المناسب سنقدم شكوى جديدة لإيقاف كهربا، أنا شايف ان كهربا ملوش دور في الاهلي ولا له تأثير، والدليل انه بعد تبديله في النهائي الأهلي اتعادل.

- الناس اللي بتقولي انت صفتك ايه في النادي.. أنا منصبي حاليا رئيس اللجنة العليا للعضويات والاشتراكات، ورئيس اللجنة العليا للرياضة في النادي ومن حقي اتعاقد واجيب لعيبة، ورئيس اللجنة العليا للتعيينات، ولدي جميع الصلاحيات بدون الرجوع للمجلس.

- ازاي الخطيب ياخد 228 مليون جنيه من تركي الشيخ لصالح النادي ويحطهم في جيبه لا يتم معاقبته، وأنا اخد 150 مليون جنيه المفروض انهم ليا ولكني حطيتهم في النادي اتحبس.

- منعت الزوج من تسجيل زوجة ثانية في عضوية النادي، علشان عاوز احافظ على الأسرة المصرية.