شن مجدي عبد الغني، نجم منتخب مصر السابق والإعلامي الحالي، هجومًا حادًا على لاعب الأهلي محمود عبد المنعم كهربا بعد ازمته الأخيرة مع محمد رمضان المدير الرياضي للنادي.
وقال مجدي عبد الغني، في تصريحات عبر قناة "الشمس":"الكابتن كهربا، للأسف الشديد عمل أزمة في الأهلي، على الرغم من أن النادي الأهلي وقف جنبه بشكل كبير جدًا، وعمل معاه كل حاجة، وجاب ناس تتبرع بالغرامة، وعمل إعلانات عشان ميدفعش كتير فلوس الغرامة، دفع حاجات بسيطة من جيبه والباقي الناس اللي دفعتله".
وتابع:" كهربا، بقاله فترة بيشارك ومش بيهدف، لذلمك لا يعتمد عليه كولر، بشكل أساسي، كولر هو صاحب وجهة النظر الفنية، الإدارة لا تتدخل في أي أمور فنية، بدليل لما كنا بنلعب الخطيب، كان بيقعد احتياطي، والجمهور يطالب بمشاركته، وكان لما بينزل في أخر ربع ساعة يجيب جون، ولكن الإدارة لم تتدخل وتطلب من المدير الفني مشاركته بصفة أساسية".
وأضاف:"أوعى تفتكر إنك أكبر من الأهلي، ده للأسف اللي اللعيبة نسيته، اللعيبة تخيلت انها أكبر من الأندية من كتر ما الأندية بتعرض فلوس لضم اللاعبين".
واستكمل: " النادي هو اللي باقي وإنت إلى زوال الأندية مستمرة، محدش أكبر من ناديه".
واختتم: "متفتكرش إنك أكبر من النادي خاصة لو ليك ماضي، إنت ليك فيديوهات بتقول بتحب الزمالك وبتموت في تراب الزمالك، مينفعش بقى تخرج عن الإطار في الأهلي، الناس فاكرة ماضيك مفيش حاجة بتتمسح".
تابعوا آخر أهل مصر على Google News
