محمد طارق مهاجمًا مسئولي الزمالك: متعرفوش يعني ايه احترام

شن محمد طارق، مدافع الفريق الأول لكرة القدم بنادي الزمالك، هجومًا ضد مسئولي النادي؛ بسبب عدم قيده في الفريق قبل نهاية الميركاتو الصيفي المقبل.

وكتب طارق، عبر حسابه الرسمي على «إنستجرام»: «بعد إغلاق القيد عاوز أقول كلمتين، أولًا بلاش تتخدعوا في الناس، الواحد مكانش محتاج من الناس غير شوية احترام واحترافية في التعامل، لكن ده محصلش».

طارق: هقعد شهرين من غير نادي

وأضاف: «مبحبش أتكلم كتير بس النهارده أنا شبه هقعد شهرين بدون نادي، لكن تعالوا نعكسها كده، لو أنا لاعب وسبت النادي بتاعي وهو محتاجني أوي وروحت نادي تاني علشان فلوس أو غيره الناس والجمهور بيقلبوا الدنيا».

وتابع: «أما لما النادي اللي اتربيت فيه ولعبت وكسبت معاه بطولات وجزء لو صغير من النادي وابن النادي، وأكون راجع من أولمبياد وأرجع علشان أنزل التمرين وأكلم المسؤولين وشهرين محدش يرد ولا يتواصل معاك».

وواصل: «على فكرة معنديش مانع تفسخ معايا عادي جدًا، هي دي الكورة وده جزء من الاحتراف، لكن أنتوا لا ترتقوا أنكوا تكونوا مسئولين في نادي كبير، ولا تعرفوا يعني إيه احترام للاعب، الصغير قبل الكبير، عكس أي نادي تاني».

واختتم: «لكن الجمهور واللاعبين أحب أشكرهم على كل يوم قضيته داخل النادي، وبحبكوا جدًا، وشكرًا على كل الحلو اللي عشته والبطولات اللي خدناها سوا، وأسف لو أثرت في يوم من الأيام».