شوبير: الشرط الجزائي لكولر أكبر من ديون الزمالك بس الأحمر معاه فلوس يدفع

تحدّث الإعلامي أحمد شوبير خلال برنامجه الإذاعي صباح الثلاثاء عن الانتقادات التي وُجّهت إليه عقب تصريحاته الأخيرة بشأن وضع نادي الزمالك ومدربه جوزيه بيسيرو، ومقارنته بالوضع في النادي الأهلي.

وقال شوبير ساخرًا: "أحد الأصدقاء قال لي: (يعني بيسيرو مدرب فاشل؟ يا راجل ده كولر شرطه الجزائي أكتر من كل الفلوس اللي على الزمالك)"، مضيفًا في رده: "ماشي، بس الأهلي يقدر يدفع، ما عندوش إيقاف قيد ولا مشاكل مع فيفا، عندهم إمكانيات، وقرروا إن الوقت مناسب لتغيير المدرب، إيه المشكلة؟ ليه الكلام يزعلك؟".

وتساءل شوبير مستنكرًا: "فين المقارنة بين الأهلي والزمالك في اللي قولته؟ أنا فقط نقلت واقع: مجلس إدارة الزمالك اجتمع وبيفكر في رحيل بيسيرو، والنادي اتعرض لإيقاف قيد جديد بسبب باتشيكو، وقبله خالد بوطيب، فين الغلط؟".

وأضاف: "أنا دايمًا بقول إن الكلام عن الزمالك زي اللي ماسك سلك عريان، أي جملة تُفهم على إني ضد النادي، حتى لو قلت إن الزمالك تعادل مع البنك الأهلي 2-2، في ناس ممكن تقول لي: إزاي تقول كده؟!"، واختتم ساخرًا: "يعني عايزني أقول النتيجة كانت 1 مقابل 1 زائد 1؟ برضو هيقولوا إني بشمت!".