حازم إمام عن منتخب مصر: "اللاعبين لازم يخلصوا الفرص.. والسيطرة مش كفاية"

عبر حازم إمام، نجم كرة القدم المصري، عن استيائه من ضياع الفرص في مباراة منتخب مصر أمام زيمبابوي، خلال تحليله للمباراة عبر قناة "أون سبورت 2".

وقال إمام: "مش ممكن 35 محاولة وأجيب جونين، واحد في الدقيقة 90 وفي آخر لحظة، مينفعش، 17 عرضية ومفيش ولا واحدة منهم تصل للاعبين، لازم اللاعبين هم اللي يخلصوا الفرص".

وتابع: "انت كمدرب بتعمل كل اللي عليك، لكن اللاعبين لازم يكون عندهم التركيز لتحويل الفرص لأهداف، لو كنت جبت هدف بدري شوية كان الناس هتقول مصر لعبت كويس، لكن التأخر في التسجيل خلا الناس تشعر أن الفوز كان صعبًا".

إمام أضاف: "اللي بلومه على اللاعبين هو ضياع الفرص، مش ممكن تجيب كمية فرص زي دي في ماتش دولي وتضيعها، ولازم تكون مركز أكتر عند التسجيل". وتابع: "في ماتش جنوب أفريقيا مش هتجي لك نص الفرص دي، فلازم تحسم المباراة بدري لأنك لو ضيعت فرص ممكن تخسر الماتش".

وأكد حازم إمام أن الأداء والفرص الكثيرة لم تكن كافية لتحقيق الفوز بسهولة: "مش معقول إنني أنتظر لغاية آخر ثانية علشان صلاح يسجل، لازم أكون مركز أكتر في الفرص اللي بتيجي لي".