"اكتشفت أنه بيسرق، وللأسف حتى وأنا معاه ديما يسرق فى أى مكان نروح فيه، سرق فلوس من والدتى، وكنا فى عزومة عند اختى سرق الخاتم بتاعها، وجبت لها غيره من غير ما حد يعرف عشان الفضايح، رغم ان حالتنا كويسة، ولما بواجهه بينكر أى حاجة ويتعصب، رغم انى متأكدة انه مريض بالسرقة وشوفته قبل كدا بعينى، وخوفت أواجهه فى الوقت نفسه".. نطقت بهذه الكلمات حنان وهى داخل محكمة الأسرة لرفع دعوى خلع من زوجها مبررة ذلك باستحالة العشرة معه، بعد ٣ سنوات من الزواج.
روت " حنان " ماسأتها مع زوجها مريض السرقة ل"أهل مصر" معبرة عن حزنها الشديد لأنها لم تكن تعلم ذلك من قبل إلا بعد الزواج والعيش معه، حيث أصبحت تشعر بالخجل الشديد من تصرفاته أمام أهلها، خاصة أنهم أصبحوا يتوقعون أن يسرق الأشياء من داخل المنزل أثناء العزومات العائلية والاحتفالات، وقالت: "بجد أعصابي تعبت، بقيت مش عارفة أبص للناس، بيسرق فى أى مكان وأى حاجة رغم اننا مستورين والحمد لله، لكن انا مش عارفة هو بيعمل ليه كدا، انا متأكدة انه مريض بالسرقة؛ ولما أواجهه بأنه يتعالج يتعصب عليا، وأحيانا نوصل لمشكلة كبيرة ويؤكد أنه مش بيسرق، وأخد خاتم أختى، وهى عندها كاميرات وشوفته، وعشان ألم الدور والفضايح، جبت لها غيره".
وتابعت حديثها بدموع تتساقط من عينها قائلة: "بجد انا حزينة على حالى وحاله، كل أهلنا بقي يتكلموا علينا من ورانا انه حرامى لدرجة ان الناس بقت تخاف تعزمنا عندها، وأنا كمان بطلت اختلط بحد، وخاصة ان معايا طفل صغير خايفة يتعلم من والده لما يكبر، اتحملت كتير وطلبت منه نروح لدكتور نفسي يتعالج لكن رفض انه حتى يعترف أنه مريض، وطلبت منه الطلاق ورفض عشان كدا مكنش قدامى غير محكمة الأسرة".
وأكدت الزوجة انها ذهبت إلى محكمة الأسرة لرفع دعوى خلع من زوجها مبررة ذلك باستحالة العشرة معه، ومازالت الدعوى منظورة امام القضاء.
تابعوا آخر أهل مصر على Google News
