'لما اتجوزنا كان بيشتغل فى بلد عربي، واتفق معايا انى هعيش فى بيت أهله وهيعتبرونى بنتهم، وهو ينزل إجازة كل سنة شهرين، عشان يعرف يعمل لينا مستقبل، واتفقنا على كدا، لكن بعد الجواز لقيت نفسي بخدم بيت كامل وهو لما بيسافر مش بيكلمنى غير كل كام يوم مرة فى التليفون بحجة الشغل وخلافه، ولما يرجع البلد إجازة ميقعدش أكتر من شهر، وكنت بتحمل وأقول مش مشكلة كله يهون عشان خاطر بنتى اللى خلفتها، ورغم سفره إلا أن المصاريف كانت على القد، لحد ما اكتشفت أنه متجوز فى الغربة من واحدة مصرية من قبل ما نتجوز بـ٤ سنين، واتجوزنى عشان أهله محتاجين حد يخدمهم'.
نطقت بهذه الكلمات 'ولاء' وهى داخل محكمة الأسرة لرفع دعوى خلع من زوجها بعد 6 سنوات من الزواج مبررة استحالة العيش معه.
وروت الزوجة قصتها لـ'أهل مصر' قائلة: لما خلصت دراسة اتقدم ليا لما كان نازل إجازة فى مصر، وأنا لما شوفته ارتحت ليه، لدرجة انى وافقت أعيش في بيت أهله، فى شقة واتفق معايا كل سنة هينزل زيارة شهرين، وهيبعت ليا مصاريف وبزيادة، واتجوزنا وسافر بعد شهرين من جوازنا، ولقيت نفسي فى بيت عائلة خدامة للكل واتحملت على أمل أن جوزى ربنا يكرمه ويشترى لينا شقة ونعيش حياتنا، وهو كان مصبرنى بكدا، وربنا كرمنى وخلفت بنت، وكان بيجى زيارة كل سنة شهر ويمشي، وقولت لنفسي أعيش مش مشكلة أهم حاجة جوزى وبنتى لحد ما سمعت حماتى وجوزى لما نزل بيتكلموا لوحدهم.
وتابعت حديثها: وكانت صدمة ليا لما سمعته بيتكلم عن مراته التانية، ووقفت بعيد عنهم لحد ما سمعت أنه معاه ولدين منها، وعايشة معاه فى الغربة، ولما واجهته وقعدت اشتم فيها، اعترف أنه بيحبها ومتجوزها قبلي بـ٤ سنين، طلبت منه الطلاق ولكن رفض روحت محكمة الأسرة لرفع دعوى خلع ومازالت الدعوى منظورة أمام القضاء.
تابعوا آخر أهل مصر على Google News
