مصطفى في دعوى نشوز: مراتي سرقت 40 ألف جنيه من البيت

أقام مصطفى دعوى قضائية ضد زوجته بمحكمة الأسرة، لإثبات نشوزها بعد عامين من الزواج بعد أن اكتشف أنها تسرق أمواله مبررا ذلك بقوله "بتستغفلني وكانت بتاخد فلوس من ورايا بحكم أني كنت بشيل فلوس شغل في البيت كتير، وكنت أوقات كتير بلاقيها ناقصة بس هي كانت بتحلف أنها مشفتش حاجة، وللأسف كنت بصدقها، لحد ما سرقت مبلغا كبيرا وده اللي كشفها قدامي، وعرفت أنها بتاخد الفلوس تحوشها عند أمها عشان معرفش".

وأَضاف الزوج في حديثه مع "أهل مصر": "أول ما اتجوزنا فهمتها أكتر حاجة بكرها وهي الخيانة، ولازم يكون في ثقة بنا، ويعلم ربنا مكنتش بحرمها من أي حاجة، كل اللي بتطلبه بيكون عندها، عشان حالتي المادية الحمدلله كويسة، لكن هي للأسف مشيت على دماغ أمها وسرقت فلوسي".

وتابع: "سرقت أكتر من 40 ألف جنيه، اللي زي دي هتربي أطفال إزاي وهي حرامية وكدابة، وعندما تواجهنا لقيت أمها بتقول لي حقها أنها تأمن نفسها وتشيل للزمن، وأني بخيل".

وتابع حديثه: "كمان هي مش محرجة ولا حاسة بذنب السرقة اللي عملته، بتقولي طقلني وهاخد الدهب والعفش وقايمة المنقولات الزوجية، غير اللي الفلوس اللي سرقتها من ورايا، لحد ما بقيت مش عارف دي بتعمل كده إزاي، واضطريت أني أحاول أعدل منها وحاولت أسامحها، لكن افتكرته ضعف مني، وبقيت تخرج تروح عند أمها من غير ما تخبرني وصوتها وطريقتها بقت لا تطاق عشان كده قررت أرفع عليها دعوى نشوز وانتظر أولى الجلسات".