"بيضربني وبيشتمني بأبشع الألفاظ وبيهملني بشكل مش طبيعي، وهددني أنه هياخد ابني ويطلقني لو رفضت أنه يتجوز عليا"، هكذا بدأت "زينب" من داخل محكمة الأسرة لرفع دعوى خلع من زوجها بعد 5 سنوات من الزواج، مبررة استحالة العشرة معه.
وقالت "زينب" لـ"أهل مصر": "عمري ما كنت أتخيل أن جوزي يكون بيكرهني بالشكل ده، واتصدمت لما عرفت أنه بيدور على عروسة سورية على الإنترنت، ولما واجهته وأعترضت على اللي بيعمله وأني مش هقبل أنه يتجوز عليا لقيته بيضربني وبيشتمني بأبشع الألفاظ وبيهملني بشكل مش طبيعي".
وأضافت الزوجة: "تزوجت من 5 سنوات جواز صالونات بعد ما خلصت الدراسة الجامعية، وكان أملي أن أعيش في أسرة مستقرة وبيت هادئ مش بحلم بأكتر من كده، ووافقت عليه بعد ما أتقدم لي وعرفت أنه بيشتغل في شركة كويسة، ومرتبه يعيشنا في مستوى عالي، واتجوزنا بعد 6 أشهر من الخطوبة، وكانت الحياة مستقرة بشكل كبير بخلاف المشاجرات البسيطة اللي بينا وكانت بتعدي، وربنا رزقني منه بطفل وكنت فاكرة أنه هو كمان عايز الحياة مستقرة بيننا، لكن أكتشفت أنه بيخطط عشان يتجوز عليا من فتاة سورية، وبدأ رحلة البحث عن عروسة على مواقع التواصل الاجتماعي".
وتابعت حديثها قائلة: "أكتشفت من شهرين أنه بقالة فترة بيبحث على مواقع التواصل الاجتماعي، عشان يتعرف على فتاة سورية للجواز، وعرفت عن طريق واحدة قريبته ولما بحثت في اللاب توب الخاص به، لقيت كل السيرش عن التعرف على فتاة من سوريا، وواجهته وكنت فاكرة أنه هيعتذر لكن واجهني وأكد أنه بيدور على عروسة سورية، ولما أعترضت وعليت صوتي عليه ضربني وهددني أنه هيأخد ابني وهيرميني في الشارع، عشان كده خوفت وقررت أخلع منه وأخد ابني وأعيش بعيد، فرفعت دعوى الخلع ومنتظرة أولى الجلسات".
تابعوا آخر أهل مصر على Google News
