أمل فى دعوى الخلع: زوجي عديم الشخصية وحمايا كل شوية يطردنى من البيت

تقدمت أمل بدعوى قضائية أمام محكمة الأسرة بزنانيري بعد عام وشهر من الزواج لرفع دعوى خلع من زوجها مبررة ذلك بقولها: 'عديم الشخصية وعمره ما يقدر يواجه أهله أو يعترض، هو يشتغل ووالده ياخد منه الفلوس وهو اللى يصرف على حسب ما هو شايف، حتى لو رايحة للدكتور مهما أكون تعبانة لازم والده يوافق، وأهلى ييجو شقتى بحساب، ولما قررت أرفض حياة الذل دى، وحمايا عرف طردنى وجوزى ولا فكر يقف قدامه'.

حمايا متسلط وحماتى عايزانى خدامة

وقالت الزوجة فى مستهل حديثها مع 'أهل مصر': 'أول ما خلصت الجامعة اتقدم لي شاب أكبر منى بـ 4 سنين، وكان شرطه أنى أعيش فى بيت العيلة، ورسموا لي الأحلام الوردية وأن والده راجل طيب وبيصرف على البيت، ووالدته ست محترمة، ووافقت، لكن فوقت على واقع مرير، لقيت حمايا متسلط وحماتى عايزانى خدامة، وزوجي عديم الشخصية ميقدرش يقول كلمة لأهله حتى لو هم اللى غلطانين'.

كل فلوس شغل زوجي يأخدها منه والده

وتابعت حديثها قائلة: 'عشت فى حجيم، كل حاجة بحساب، ممنوع أمسك فلوس فى إيدى أو اشترى أى حاجة، حمايا اللى يشترى، ولو احتجت حاجة شخصية معرفش أقول لحمايا، وجوزى كل فلوس شغله بيأخدها منه والده بحجة أنه يكون له مستقبله، وزيارة أهلى بمواعيد وبعد موافقة حمايا طبعا، عشان كدا طلبت أستقل بنفسي وبجوزى، وطلبت من جوزى نعيش فى شقة بعيد أو فى البيت بس لوحدنا واتفاجئت انه قال لحمايا فطردنى من البيت، دا غير أى خلاف يطردنى من البيت، وطلبت الطلاق ورفضوا، فرفعت دعوى خلع ومازالت الدعوى منظورة أمام القضاء'.