منال تطلب الخلع: «جوزي رفض يدخل أختي شقتنا بحجة أنها كلمت شاب على النت»

"أختي لسه في الجامعة، وبتعيش فترة مراهقة ودخلت في علاقة عاطفية فقط مكالمات مع شاب اتعرفت عليه على النت، وحكت معايا وأنا نصحتها تبعد عنه وفعلًا بعدت وسمعت كلامي، لكن للاسف جوزي سمعنا وخد فكرة مش كويسة عنها، لدرجة أنه منعها تدخل البيت عندنا".. نطقت بهذه الكلمات منال البالغة من العمر 35 عامًا، داخل جدران محكمة الأسرة لرفع دعوى خلع من زوجها مبررة استحالة العشرة معه بعد 4 سنوات من الزواج بسبب تقمصه دور الملائكة.

وقالت الزوجة في مستهل حديثها مع "أهل مصر"، "اتجوزت من 4 سنين من شخص أكبر مني بـ5 سنين، وكان كريم لدرجة كبيره لكن مشكلته أنه شكاك ومش صادق مع نفسه، يدعى الفضيلة والأخلاق ويسب ويشك في كل الناس وهو أكتر شخص يقول النصيحة وميعملش بها، لكن قدام الناس يدعى أنه رجل المبادئ وعلى الرغم من ذلك لم انتقده يوما ما".

وتابعت: حتى في يوم جاءت اختى في سنة أولى جامعة، وطيبة ومتعرفش تتعامل مع الناس، وعمرها ما دخلت في علاقات لحد ما في يوم صدفة اتعرفت على شاب على النت، وجاءت قالتلي ونصحتها أنها تبعد عنه لو عايز يتقدم هيتقدم، وفعلا سمعت كلامي وقطعت علاقتها بيه نهائيا لكن جوزى سمعنا وبدأ في معايرتي بيها ونظرته كلها احتقار وإساءة لاختي، لحد ما في يوم رفض يدخلها شقتنا وهانها وعاب في أخلاقها فقررت أنى لو أختى مشيت همشي، وسابنا وقفل الباب، ولما روحت بيت أهلي طلبت الطلاق ولكن قالي هسيبك معلقة فقررت ارفع دعوى خلع ومنتظرة أولى الجلسات".