أقدمت منال على رفع دعوى خلع أمام محكمة الأسرة بزنانيرى لطلب الخلع من زوجها بعد عام ونصف فقط من الزواج، مبررة ذلك بقولها: 'من أول ما اتجوزنا وهو معيشني فى نكد بسبب مقارنته بينى وبين اختي المتجوزة وكل شوية يعانرني بجمالها وجسمها لدرجة اني مبقتش استحمل انها تزورني، بحس بنار لما تكون موجودة وزوجى عينه هتطلع عليها، وأنا متأكدة أني اختي عمرها ما تبص له لأنها بتعشق زوجها، لكن كلامه عليها خلى الشيطان يدمر حياتى، وبقيت مش قادرة اكمل حياتى معاه'.
سنة ونصف زواج
قالت الزوجة : ' أنا الأخت الصغيرة في اخواتي ومعايا أختى متجوزة قبلى بـ4 سنين؛ بعد قصة حب هى وجوزها، واتقدملي عريس مناسب من كل المواصفات وتزوجنا بعد 5 شهور من الخطوبة؛ ومن أول ما شاف أختى الكبيرة وجمالها وهو على طول فى سيرتها كنت بكدب نفسى فى الأول وأقول استحالة يكون في نيته حاجة وحشة، لحد ما اتجوزنا واتأكدت ان عينه من أختى لما بشوف نظراته ليها غيرته وهى بتكلم جوزها وتتدلع عليه، لحد ما بقي بيعايرنى بيها ويقول لى انتى مش حلوة ودلوعة زى اختك ليه، كنت بحس بنار وهو بيقولي كدا ديما بيدخلني فى مقارنات معاها.
رفع دعوى خلع
وتابعت حديثها لـ'أهل مصر': 'كنت خلاص قربت اكره اختي، بتخنق لما تيجى البيت بسبب زوجى ونظراته ليها، اللي هي مش واخده بالها منها وأنا عارفة ومتاكدة انها عمرها ما ركزت ان جوزى بياكلها بعينه، لأن حبها لزوجها مكفيها، كنت بحاول أعدي وأمشى الأمور ولكن جوزى بطريقته عقدنى وطلبت منه الطلاق ورفض وقال لى مش هطلقك واعملى اللى تعمليه، مالقتش قدامى غير إني احافظ على الباقي من كرامتي عشان كدا قررت رفع دعوى خلع فى محكمة الأسرة وانتظر الحكم'.
تابعوا آخر أهل مصر على Google News
