ولاء أمام محكمة الأسرة: "شغلني خدامة وبيصرف فلوسي على الحشيش"

'حياتى معاه حجيم طول الوقت ضرب وشتيمة ومش ضرب عادى دا بالسكنية ويعورني لحد ما شوه جسمي، لحد ما طفح بي الكيل منه ومن العيشة معاه، دا جهنم أحسن من القعدة معاه فى بيت واحد'، هكذا بدأت ولاء حديثها من أمام محكمة الأسرة، حيث قامت برفع دعوى خلع للتخلص من الحياة التي أجبرتها عليها الظروف.

٣ سنوات من الزواج

بدأت الزوجة حديثها بكلمات مهزوزة قائلة:' كنت دايما عايزة أهرب من خدمة مرات ابويا وظلمها ليا، كانت ديما تعاقبني ومكنتش بحس ان ابويا بيحبنى، وو على أول عريس اتقدملي عشان يخلصوا مني، وأنا وهمت نفسي أن الجواز احسن من مرات ابويا لكن للأسف نصيبى وقعنى فى واحد مدمن وبيشرب ولا يعرف حاجة عن مسئولية البيت، وطلب مني انزل اشتغل فى خدمة البيوت عشان أساعد فى مصروف البيت، رفضت فى الأول ولكن بعد ضربه ليا وافقت، كان بياخد شقايا وتعبي يصرفه على المخدرات، ولو رفضت يضربني بالسكنية فى جسمى أو أيديا'.

جسمى اتشوه من ضربه لى

وتابعت الزوجة لـ'أهل مصر' قائلة: 'بقي دا حالى لحد ما جسمي اتشوه من كتر ضربه ليا، كل فلوسى وتعبي بيصرفه على المخدرات مع أصحابه، وكمان ملقتش حد يقف جنبى، وياخدلي حقي، أبويا ما صدق رمى مسئوليتى، لحد ما ربنا كرمنى ولقيت أوضة صغيرة وأجرتها وبقيت اشتغل، عشان كده رفعت عليه قضية خلع في محكمة الأسرة، ولسا الدعوى منظورة أمام القضاء'.