منى فى دعوى خلع: "كان بينادى عليا باسم عشيقته"

'كان بينادى عليا باسم عشيقته، 8 سنين جواز مستحملة خيانة وسهر وشرب وقرف وضرب ، كنت بصحى بالليل أسمعه بيعمل معها علاقة جنسية فى التليفون ولما كلمته ضربنى، ويهددنى انه هيجيبها البيت كنت خايفة فى البداية أطلق عشان ولادى لكن خلاص بعد ما ابنى سمعه بالليل بيتكلم مبقتش فارقة'.. نطقت بهذه الكلمات منى وهى داخل محكمة الأسرة لرفع دعوى خلع من زوجها بعد ثمانى سنوات من الزواج مبررة ذلك باستحالة العشرة معه.

8 سنين جواز

قالت الزوجة: 'أنا متزوجة من ٨ سنين جواز صالونات وتعلقت جدا بيه بعد الجواز، لكن للأسف بعد كام شهر اكتشفت انه بيكلم واحدة وشفت رسائل كتير لدرجه انه كان لما بينادي عليا كان بيقولي اسمها، اتكلمت معاه وحلف إن مافيش حاجه وهيبقي كويس وبعدها بفترة رجع كلمها تاني وعرفت ان هي حبيبته القديمة واتكلمت معاه تاني كل مرة يحلف إن مافيش حاجه وانا غلط، وآخر مرة سمعته كانوا بيمارسوا العلاقة على التليفون، ولما كلمته ضربنى، وهددنى أنه هيجيبها البيت كنت خايفة فى البداية أطلق عشان ولادى، وقولت أتحمل يمكن ربنا يهديه ويتوب ولكن مفيش فايدة'.

ابنى سمعه وهو بيتكلم مع ست

وتابعت حديثها لـ'أهل مصر': 'عندي منه ولد وبنت ومن فترة كان عايز أطفال تاني وأنا تعبانة وجالي الضغط والقلب منه قلتله مش هينفع أنا تعبانة زعق وقالي هتجوز عليكي وفعلا حملت ومافيش ١٥ يوم سقطت بسبب ان الضغط عالي ، كان يشوفني تعبانه كان ينزل ويسهر ويعيش حياته يشرب حشيش وسجاير وكل يوم سهر وخروج حتى علاقته بالست اللى بيكلمها رفض يبطلها ، لحد ما مرة سمعه ابنه الكبير اللى عنده 6 سنين وقالى، هو دا اللى خلانى طلبت الطلاق ورفض يطلقنى سبت البيت ورفعت عليه دعوى خلع .