حالة من الجدل اجتاحت مواقع التواصل الإجتماعي بعدما عرضت قناة النهار مقطع فيديو من برنامج 'اسأل مع دعاء' للمذيعة دعاء فاروق مداخلة هاتفية من سيدة تعرض مشكلتها الخاصة بانفصالها عن زوجها بعدما جلبته عن طريق السحر.
خلال المداخلة قالت المتصلة: عايزاكم في حاجة بس ياريت لا تقطعوا عليا الخط ولا مش عارف ايه.. اسمعوني للآخر .. أنا اتجوزت واحد ما بيحبنيش وأنا عارفه انه مش بيحبني عملته سحر عشان اجيبه وجبته فعلًا ودفعت مبلغ كبير جدًا عشان اعمل العمل ده ونجحت أني أفرق بينه وبين مراته وسببت لها أذى كبير لدرجة انها ممكن تجري تصرخ في الشارع وحاجات تانية كتير.
وتابعت: خربت بيتها واتجوزت جوزها وكنا عايشين كويس 4 سنين لحد ما في يوم كان بايت عندي وصحي فجأة أكنه مش عارفنى وطلقني.
وواصلت: روحت للي عملي العمل عشان يشوف ايه اللي حصل قال لي إن العمل اتفك من عند ربنا وبما انه اتفك كده مستحيل يتعمل تاني.
طلبت أعمل له عمل تاني قالي مينفعش خلاص انسى.. قولتله دا مش فاكر اى حاجة بنا حصلت ولا فاكرنى ولا فاكر العيال رد عليا وقالى ايوة دا طبيعي لأن المسحور لما يفوق بينسي كل اللى حصل في فتره السحر بقيت هتجنن مش عارفة اعمل ايه .بس هو لما طلقنى ادانى كل حقوقى.. كامل حقوقي ويصرف على الأطفال ومدارسهم.
وأكملت: كنت بكلم رجاله كتير بس بنتكلم فون وكده يعنى مش بيحصل بنا حاجة فى الحقيقة بس ولاد الحرام وقعوا بنا ووصلوله الكلام ده بعد ما طلقني وهو شك ودور ورايا ووصل للأرقام دي وكلم الرجاله دي وبقى شاكك في ان العيال مش عياله.. مبقاش عايز يكلمهم ولا يعرفهم.
وأشعلت المكالمة غضب نشطاء مواقع التواصل الإجتماعي حيث تفاعل عدد كبير من مستخدميه وتصدر هذا الفيديو نسبة مشاهدة كبيرة وتم تداوله على نطاق واسع.
تابعوا آخر أهل مصر على Google News
