بالدموع.. رضوى الشربيني تعلن إيقاف برنامجها وتوجه رسالة مؤثرة لجمهورها (فيديو)

أعلنت الإعلامية رضوى الشربيني، توقف حلقات برنامجها 'هي وبس'، بشكل مؤقت، مشيرة إلى أنها بحاجة إلى إجازة قصيرة للابتعاد عن الضغوط.

وقال رضوى، إن السبب وراء توقفها المُفاجئ هو احتياج ابنتيها إليها، لافتة إلى أن الموسم الخامس من برنامجها كان أصعب المواسم وحلقاته كانت ثقيلة، وتطلب بذل مجهود كبير لتقديم أفضل محتوى للمشاهدين.

وأضافت 'الشربيني'، في برنامجها المُذاع عبر قناة 'CBC سفرة'، 'أنا عارفة إن أنا أول مرة أعمل الحركة دي في أي موسم، قعدنا أربعة مواسم ماعملتهاش، أنا بستأذنكم إن أنا أطلع إجازة وإن شاء الله مش هتبقى إجازة طويلة، هحاول على قد ما أقدر، أنا عارفة إنكم اتعودتم إن كل المواسم بتكون بالشهور الكتير دون فاصل في النصف'.

وأضافت: 'في الحقيقة أنا بناتي زعلانين مني جدًا وهما قاعدين وراء الكاميرا دلوقتي، فعايزة أكون معاهم شوية، وكنا بدأنا الموسم من قريب، فمهنيًا، ما ينفعش وكنا متفقين مع ناس، ولقيت التوقيت المناسب رأس السنة، انتم بتحتفلوا وأنا كمان احتفل مع بناتي حبايبي وأمي واللي حواليا، واخد إجازة'.

وتابعت: 'أنا بعتذر وعارفة إنكم بتستنوا البرنامج بس عايزاكم تعذروني وأنا بحبكم جدًا جدًا، مش هكون معاكم لأول مرة في رأس السنة، خليني أقولكم 2020 كانت كرم وستر في كل الأحوال لكن سنة تقيلة علينا جميعًا ومكناش مستعدين حتى نفسيًا ليها، عليكي بالدعاء والإلحاح، أي مصيبة وقعنا أو هنقع فيها ماحدش هينجدنا إلا ربنا، خلي عندك ثقة في الله سبحانه وتعالى، وتفاءلوا بالخير تجدوه'.