روت الدكتورة سمر العمريطي تفاصيل جديدة في واقعة فيديو مستشفى السلام الدولي بالمعادي.
وخلال تصريحات خاصة لـ"أهل مصر" قالت العمريطي: "ابني جاله تشنجات ودي أول مرة تحصل، وعشان يتم تشخيص الحالة لازم يعمل رسم مخ في أول 16 ساعة".
وتابعت العمريطي: "الدكتورة اللي استقبلتني في المستشفى قالت هندخله الرعاية ونعمله كل حاجة وخلوني سيبته ومشيت، وأما رجعت تاني يوم لقيت ابني لابس هدومه وهيخرج من المستشفى، سألت ايه الموضوع قاله مش عنده حاجة، برغم انهم مش عملوا رسم مخ ولا حاجة، برغم ان رسم المخ أساسي لتشخيص الحالة".
وواصلت العمريطي: "أنا كنت منهارة وبموت ومش عارفة أتصرف ازاي.. طيب لو أنا مش طبيبة ومش فاهمة كنا قولنا ماشي، عشان كده أنا عملت "لايف" من المستشفى عشان اللي حصل ده مش يحصل مع حد تاني".
وأكملت العمريطي باكية: "حتى فاتورة الحساب كاتبين فيها أرقام كبيرة.. يعني مثلا 2500 جنيه.. وأما سألنا ليه.. قالوا دي رعاية فندقية".
وفيما يخص التشكيك في عضويتها بنقابة الأطباء قالت: "أنا مسجلة استشارية بنقابة الأطباء".
وكانت الدكتورة سمر العمريطي، قد اتهمت مستشفى السلام الدولي بالمعادي بالإهمال قائلة: "ابني وقع مني، وروحت المستشفى عندهم مفيش دكاترة ولا أجهزة ولا منظومة صحية".
وخلال فيديو على صفحتها الرسمية بموقع التواصل الاجتماعي "فيسبوك" تابعت الدكتورة سمر العمريطي: "أنا الدكتورة سمر العمروطي، وبناشد وزير الصحة يشوف الإهمال اللي موجود ده.. يعني ايه أروح مستشفى ويقولولي الدكاترة في السخنة بيصيفوا!.. وطلبوا مني 30 ألف جنيه ودفعتهم وبرضو مفيش أجهزة".
وواصلت العمروطي: "المستشفى بياخدوا فلوس من الناس بس، ومفيش حد موجود، وحتى رسم المخ بيقولوا جهازه الدكتور قافل عليه".
وأكملت سمر العمريطي: "في حالة تاني وصلت وأنا موجودة، وأخدوا منهم 100 ألف جنيه، ونفس النظام والسيناريو".
ووجهت رسالة استغاثة للرئيس السيسي، ووزير الصحة قائلة: "انجدونا من الناس اللي بيتاجروا بدم الغلابة.. أنا موجودة في المستشفى ومفيش غير عمال النظافة، واخدوا مني 30 ألف جنيه ومش عملوا حاجة لابني، وكتبوله على خروج، من غير حتى ما يدوله "أسبرينه".
تابعوا آخر أهل مصر على Google News
