«مش بخاف من الموت والطليان وصفوني بسوبر مان».. شاب مصري يروي قصة إنقاذ فتاة إيطالية من الموت

كشف علاء الدين سليمان إبراهيم من مواليد محافظة الدقهلية، تفاصيل إنقاذ فتاة إيطالية من الموت حرقًا داخل السيارة، ورفضه الحصول على مكافأة مالية كبيرة من والده.

ونجح علاء الدين الشاب المصري المقيم في إيطاليا من إنقاذ فتاة إيطالية من الموت المحقق عندما انحرفت سيارتها في منطقة 'فوجيرا' وتعرضت لحادث سير في طريق 'أمندولا' بعد منتصف الليل، ثم اصطدمت بشجرة كبيرة بقوة، لينشب حريق كبير في السيارة.

تفاصيل إنقاذ شاب مصري لفتاة إيطالية بعد حريق سيارتها

وقال الشاب المصري علاء الدين، في تصريحات خاصة لجريدة 'أهل مصر'، أنه عقب عودته من العمل قبل منتصف الليل في تمام الساعة 11 ونصف مساءً، سمع صوت اصطدام شديد بجوار المنزل بعد منتصف الليل بقليل.

اصطدام السيارة في شجرة واشتعلت بالنيران

وأضاف أنه كان يجلس داخل منزله في هذا التوقيت، لكنه سمع صوت اصطدام سيارة بشكل قوي، ليخرج على الشارع مسرعًا ويجد السيارة مصطدمة في شجرة، متابعًا: 'سمعت خبطة جامدة زي الانفجار وخرجت اطمن لاني ساكن في دور أرضي، لقيت عربية دخلت في شجرة كبيرة ومطلعة دخان بطريقة رهيبة ومفيش حد في الشارع'.

وأكمل: 'لقيت العربية بتطلع نار من كل جنب، لكن ربنا ألهمني أروح بسرعة أشوف العربية لأن مفيش حد خرج منها لغاية ما ممسكت النار فيها، وبفضل ربنا كرمني روحت للعربية، وربنا ساعدني في فتح الأبواب، لقيت فتاة جوا العربية مغمى عليها ووشها كله دم، والنار بدأت تدخل في العربية، لكن أنقذت الفتاة وخرجتها بعيد عن العربية في مكان آمن'.

شاب مصري ينقذ فتاة ايطالية

وأردف: 'روحت مرة تانية أبص على العربية عشان ممكن الفتاة كان معاه كلب أو حد من أبنائها لكن ملقتش حد، وبعدين العربية اشتعلت بطريقة رهيبة لغاية ما جاءت الشرطة والمطافي وطفيت النيران'.

واستطرد: 'الشرطة أخذت بياناتي وأقوالي والبنت انتقلت في الإسعاف للمستشفى، وتاني يوم لقيتهم بيتكلموا عني في الجرايد وموجهين ليا الشكر على اللي عملته ووصفوني بأنني شبه سوبر مان وقالوا عني كلام جميل'، مرادفًا: 'أنا طبعا اتشرف اني مصري، ومبسوط بحاجة زي كدا'.

شاب مصري ينقذ فتاة ايطالية

وعن المكافأة المالية، أوضح الشاب علاء الدين، قائلًا: 'أهل البنت جم عندي زيارة ووالدها عرض عليا مبلغ مالي لكني رفضت وقلت لهم إن بنتهم زي أختي واحنا معندناش الكلام دا مينفعش اخد مقابل قصاد هذا العمل، ودي حاجة انسانية، ودا في طبعا احنا المصريين نرمي نفسنا في اي حاجة ومش بنخاف من الموت بفضل الله وأنا مبسوط بحب الناس ليا، والناس كرموني بأطيب الكلام'.